Willemstad, 21 di desèmber, 2022 – Awe Curaçao Medical Center (CMC) a risibí bishita di Minister di Salú, Bienestar i Spòrt (VWS) di Hulanda, Sr. Ernst Kuipers i Sekretario di estado Sr. Maarten van Ooijen kual ta responsabel pa Salubridat di Boneiru, St. Eustatius i Saba (BES). Nan a wòrdu kompañá pa representantenan di Ministerio di Hulanda, Boneiru i di Kòrsou.
E grupo a risibí un rekorido di hòspital den e departamentunan ku mayoria pashèntnan di islanan BES ta bishitá ora nan bini Curaçao Medical Center (CMC) kual ta enserá departamentu di Diálisis, departamentu Neonatal (NICU), Radioterapia i Ronald McDonald House of Charities (RMHC).
Despues di e rekorido a sigui un reunion ku e hunta di direktiva di CMC kaminda nan e presentá temanan manera oumento signifikante di kantidat di pashèntnan ku ta bin departamentu di Emergensia den e último añanan. Alabes a duna informashon riba e akshonnan ku lo bai tuma pa mehorá kalidat di servisio ku lo resultá den un akreditashon di JCI den e próksimo añanan. Otro tópikonan a enserá retonan finansiero di CMC i inisiativanan di Dutch Caribbean Hospital Alliance (DCHA) pa mihó kolaborashon entre hòspitalnan di Karibe Hulandes.
