Willemstad, 3 di febrüari — Curaçao Medical Center (CMC) tin e plaser di anunsiá ku Lorraine Diaoen, un yu di tera, lo asumí e ròl di Interim Chief Financial Officer (CFO) entrante 4 di febrüari 2026. Banda di dirigí e strategia i funshonamentu finansiero di e hòspital, sra. Diaoen lo ta responsabel tambe pa asuntunan Operashonal, inkluyendo IT, Fasilidatnan, Planifikashon di Kapasidat, Kompra i Logístika.
Sra. Diaoen tin mas ku 25 aña di eksperensia internashonal den finansa, ouditoria i liderazgo ehekutivo den un variedat amplio di sektor, manera servisionan finansiero, produktonan di benta i konsumo, servisionan marítimo i di organisashonnan kompliká. E ta konosí pa fortifiká gobernashon finansiero, optimalisá operashonnan i tradusí vishon finansiero den strategianan kla i akshonabel. “Mi ta profundamente motivá pa duna bèk na Kòrsou dor di yuda konstruí un sistema di kuido di salú i sostenibel; e ta tantu un responsabilidat profeshonal komo un kompromiso personal. Bo ta siña, bo ta gana i bo ta duna bèk,” sra. Diaoen a bisa.
Resientemente, sra. Diaoen a fungi komo Associate Director FP&A na Kao Business Services B.V., kaminda su trabou a inkluí restrukturashon di timnan di finansa, simplifikashon di siklonan di presupuesto i mihó maneho di inventario i “cash-flow” durante periodonan di transformashon di e organisashon.
Sra. Diaoen ta un Accountant Publiko outorisá (RA) i tin un Master den Business Economics di Erasmus Universiteit Rotterdam. El a kuminsá su karera akadémiko na Kòrsou, kaminda el a obtené su Bachelor den Ekonomia na University of Curaçao (UoC). Su regreso na Kòrsou ta kombiná eksperensia internashonal ku un konosementu lokal profundo i kompromiso.
Den su ròl interino, sra. Diaoen lo enfoká riba garantisá kontinuidat miéntras e ta duna sosten na e ophetivonan stratégiko di CMC segun e organisashon ta sigui evolushoná.
CMC ta yama Sra. Diaoen bon biní i ta ansioso pa su kontribushon durante e fase importante aki pa hòspital i e sistema di kuido di Kòrsou.
