Willemstad, 25 di Ougùstus – Den un ekshibishon impreshonante di union i un propósito kompartí, e seshon “Kombersashonnan Bunita” a tuma logá 23 di ougùstus den Espasio di Trankilidat na Curaçao Medical Center (CMC). E seshon a brinda un plataforma sumamente nesesario pa koleganan di departamentu di Mucha i departamentu di Obstetria i Ginekologia pa drenta den diálogo tokante nan eksperensianan i pensamentu relashoná ku “Family Centered Care.” E oportunidat balioso aki a bira posibel dor di esfuersonan kontinuo di Ronald McDonald House Charities (RMHC), ku a bin ku e inisiativa i a kordiná e seshon aki. RMHC semper a para pa sosten di famianan den nesesidat i fasilitá diálogo den komunidat médiko pa sigui mehorá e kalidat di kuido.
Family Centered Care ta un konsepto ku ta wòrdu rekonosé mas i mas den kuido di mucha, i ta enfatisá e importansia di inkluí famianan den e proseso di kuido i desishon rondó di pashèntnan, esta e muchanan i futuro mamanan. E seshon “Kombersashonnan Bunita” a eksplorá e konsepto aki na nivel personal i a deskubrí historianan i momentunan bunita i tambe ideanan pa apliká.
Koleganan a bini huntu pa kompartí nan eksperensianan personal i momentunan ku a toká nan kurason komo hende. E momentunan emoshonal aki no solamente a revelá e dedikashon i kompashon di parti di e personal médiko, pero tambe a suprayá e bunita impakto riba pashèntnan i nan ser kerí. Un di e mensahenan prinsipal ku a sali for di e seshon tabata no solamente e importansia di duna pero alabes kuida di bo mes tambe. E partisipantenan a rekonosé ku pa brindá kuido eksepshonal na pashèntnan i nan famia, profeshonalnan di kuido mester priorisá kuido di nan mes.
E éksito di e seshon aki ta enfatisá e kompromiso di RMHC huntu ku departamentu di Mucha i departamentu di Ginekologia i Obstetria di CMC pa sigui inspirá un kultura di empatia i komprenshon.
www.cmc.cw
