Willemstad, 1 di Novèmber 2025 — Evidensia alarmante ta mustra ku e uso di vape ta plamando entre hóbennan na Kòrsou, algun ku tin te asta ocho aña di edat. Rekonosiendo e menasa aki ku a bin ta krese den kuadra di salú di hóbennan, Curaçao Medical Center (CMC), Ministerio di Salú, Medioambiente i Naturalesa (GMN) i Fundashon Maneho di Adikshon (FMA) a uni forsa den un movementu pa konsientisá, eduká, i protehá nos hóbennan.
Apesar di su imágen moderno i “trèndi”, e “vape” no ta inosente; e ta dañino. Sigaria elektróniko ta kontené nikotina, metalnan pisá, i kímikonan tóksiko ku por kousa adikshon, daño na pulmon, i malesanan respiratorio a largo plaso. Ekspertonan di salú lokal a konfirmá ku ya tin vários hóben ta risibí tratamentu médiko pa komplikashonnan relashoná ku vaping, hasiendo e kampaña akí no solamente urgente, sino esensial. “Vaping” rápidamente por resultá den adikshon i daño duradero na pulmon. Nos hóbennan meresé informashon berdadero, i no e mitonan di merkadeo.
Ekspertonan di FMA, CMC, i GMN lo bishitá skolnan rònt Kòrsou pa duna seshonnan edukativo interaktivo. E bishitanan aki ta parti di un programa ku ya ta tumando lugá, pero e luna akí lo enfoká mas riba e tópiko di vaping. E seshonnan lo konta ku visualnan skèrpi, historianan di bida real, i hèrmèntnan práktiko pa yuda hóbennan tuma desishonnan informá i saludabel, i resistí e preshon pa hasi uso di vape.
Vários skol a inskribí kaba, pero aún tin lugá disponibel pa mas presentashon. Skolnan por inskribí aki: Petishon pa charla 2 – FMA
