Willemstad, 17 di Novèmber – Awe, Dia Mundial di Beibi prematuro, ta sirbi komo un rekordatorio ku 1 di kada 10 baby na mundu ta nasé prematuro. Pa konmemorá e fecha aki, Curaçao Medical Center (CMC) ta ofisialmente ekstendé e akseso di mayor den e Unidat di Kuido Intensivo Neonatal (NICU) pa ta 24 ora pa dia, shete dia pa siman. E kambio aki ta permití mayornan keda serka di nan yunan prematuro na tur momento pa asina sostené e lasonan di union, stabilidat emoshonal i rekuperashon.
Esaki ta un otro paso importante den reforsá e filosofia di kuido sentrá riba famia. “E beibinan aki por ta chikí, pero nan forsa i esun di nan famianan ta fuera di lo normal,” segun Dr. Ginette Ecury, Spesialista Neonatal na CMC. “Permití mayornan ta presente i aktivamente envolví ta hasi un diferensia grandi den desaroyo i rekuperashon di nan beibi. Ademas, e ta kontribuí na e bienestar di e mayor.”
E maneho nobo di akseso 24/7 ta reflehá e kompromiso konstante di CMC pa “Sirbi ku Amor” i ta aliniá ku e yamada di Organisashon Mundial di Salú (WHO) pa kuido neonatal sentrá riba famia. E tim di NICU ta promové Kuido di Mama Kangaroo (Kangaroo Mother Care), sosten di duna pechu, i komunikashon habrí, sigurá ku famianan ta sinti nan mes inkluí i apoderá. “Sostené famianan no ta opshonal e ta esensial,” ta agregá Valdemar Maduro, Hefe di Enfermeronan di NICU. “Ora mayornan ta presente, tene nan beibi ’skin-to-skin’ ta parti di e kuido diario, e resultadonan ta mehorá i famianan ta sinti nan mes ménos isolá.”
Tur aña, e NICU na CMC ta risibí entre 100 pa 120 beibi resien nasí, di kual 40 pa 50 ta nasé promé ku 32 siman di embaraso. E beibinan prematuro aki hopi biaha ta rekerí sosten médiko intensivo pa pulmon, serebro i sistema inmunológiko ku no ta bon desaroyá.
