WILLEMSTAD, 28 di Ougùstùs 2024 – Curaçao Medical Center (CMC) a marka historia riba djamars, 21 di ougùstùs, ku su promé prosedura di ablashon di kurason den su “Heart Catheterization Lab” (CathLab). Ablashon di kurason ta un prosedura pa trata un problema komún ku ritmo di kurason, yamá fibrilashon di arteria. Ku e kondishon aki, e kambernan ariba di e kurason ta bati irregular i hopi lihé. Ounke fibrilashon di arteria en general no ta kousa morto, e por kousa problemanan serio, manera un kurason ku no ta pusha sanger manera e mester, of por forma koagulo ku por trese un derrame serebral.
E operashon spesial aki tabata dirigí pa Dr. Fernando di Tomasso, un kardiólogo-elektrofisiologiko di Argentina. Alabes Dr. Olivier Witte, kardiólogo (i spesialista di Pacemaker) di CMC i Dr. Jose Torres, kardiólogo intervenshonista di CMC a duna aporte na e prosed
ura. E ekipo tabata inkluí un tim profeshonal di teknikonan di Cathlab di CMC. A logra realisá e prosedura aki despues di 3 aña di planifikashon i preparashon.
Pa por a realisá e prosedura, a usa un sistema yamá “FARAPULSE” di Boston Scientific, ku ta yuda koregí e ritmo di kurason pa isolá e vena pulmonar di e atrio na man robes. Esaki ta yuda e kurason bai bek na un ritmo normal.
Awor CMC ta e uniko hòspital den e región ku ta ofresé e prosedura avansá aki. Esaki ta nifiká ku pashèntnan no tin nodi di biaha mas pa Colombia pa e tratamentu aki. Ta un paso grandi pa kuido médiko na Kòrsou i pa Karibe.
Ku e tipo di operashonnan aki, CMC ta fasilitá pashèntnan ku fibrilashon aurikular pa haña e kuido ku nan mester serka di kas.
