WILLEMSTAD, 14 di Novèmber 2024 – Curaçao Medical Center (CMC) ta rekonosé su di 5 aniversario, señalando un trayekto di resilensia, inovashon, i un kompromiso na salú i bienestar di komunidat di Kòrsou. Den e último 5 añanan, CMC a bira un símbolo di speransa i progreso i a vense hopi desafio pa por duná e mihó kuido médiko posibel.
Dia 15 di Novèmber 2019, CMC a habri su portanan den un ambiente yená ku speransa i emoshon, ku e promé pashènt simbolisando un era nobo pa kuido médiko riba nos isla. Pero esaki no a tabata un kaminda fásil. Apénas despues di su apertura, CMC a drenta un krísis global – e pandemia di COVID-19, un situashon ku a tèst e forsa di hospital, i kon lew e por yega ku su rekursonan. El a eksigí un kompromiso inmenso di su personal. Sinembargo, CMC a perseverá.
Logronan di Dedikashon
Apesar di e desafionan, CMC a alkansá logronan signifikante ku ta demostrá su dedikashon na kuido médiko na Kòrsou. Awe pa e promé biaha den kuater aña, e lista di espera pa pashèntnan a baha bou di 1.000—e logro remarkabel ku ta reflehá e dedikashon di CMC pa duna kuido médiko a tempu i aksesibel. E kompromiso di kalidat ta reflehá tambe den e meta pa logra e akreditashon di Joint Commission International (JCI), un standart rekonosé mundialmente pa ekselensia den kuido médiko. I na 2023, CMC su enkuesta di satisfakshon di pashèntnan a raportá un averahe di 8.6, ku e departamento di Radioterapia a risibí un skor impreshonante di 9.2 pa su servisio personal i efisiente – un testimonio di promesa di CMC pa “Sirbi ku Amor.”
Algun otro Inisiativa:
Durante e añanan, CMC a sigui mehora e servisio i esfera:
- Servisio di Botika Mehorá: E botika di CMC a digitalisá e proseso di remedi di kimoterapia, garantisando un nivel haltu di siguridat pa pashèntnan. Alabes a digitalisá e proseso di resèpt ku ta fasilitá pashèntnan pa por buska nan resèpt na kualke botika.
- Orario di Bishita Ekspandé: Pa selebrá su di 5 aniversario, CMC a introdusí un orario di bishita mas largu pa famianan, ku por bishitá for di 11or di mainta te 8or di anochi. E inisiativa aki ta reflehá e kompromiso di CMC pa kreá un ambiente di sosten pa pashèntnan.
- Programa pa Konektá ku Komunidat: E serienan “Bida Tras di Kortina” i “Puntra un Eksperto” ta trese komunidat mas serka di práktikanan médiko, miéntras ku e seshonnan na CMC di “Sperando Bida” ta duna guia esensial pa mayornan ku ta spera un beibi.
- Muzik i Sanashon: Rekonosiendo ku muzik ta brinda lus i felisidat, CMC a invitá talentonan lokal pa alegrá e dia di pashèntnan i stimulá moral di personal. E aña aki, CMC a risibí un piano di regalo ku a duna momentunan di alegria i trankilidat.
- Aporte di Boluntario: E boluntarionan di CMC ta simbolisá e lema di hospital, “Sirbi ku Amor,” dunando sosten na pashèntnan i personal ku amor i dedikashon.
Un Aliansa ku Komunidat Fundá riba Konfiansa
E último 5 añanan a suprayá e forsa di kolaborashon di CMC ku su personal dediká i komunidat di Kòrsou. Durante tenshon finansiero i demanda operashonal, CMC a keda transparente, i riba un base regular a kompartí desaroyonan di hospital i sifranan pa mantené komunidat informá.
E dedikashon di personal di CMC ta kla den tur aspekto di operashon di hospital, for di treinen kontinuo te na aktividatnan ku ta stimulá bienestar i union entre e empleadonan. CMC ta orguyoso pa sostené su tim, meskos ku nan ta sostené komunidat di Kòrsou ku konosementu, kuido, i empatia tur dia.
Mira Dilanti ku Speransa i Determinashon
Awe, 5 aña despues, CMC ta mas ku un edifisio; e ta un testimonio di resilensia, un esfuerso kolektivo, i un símbolo di forsa i espíritu di Kòrsou. Mirando dilanti, CMC ta reafirmá su kompromiso pa duná kuido médiko eksepshonal, pa avansá bienestar médiko, i pa krese huntu ku e komunidat ku e ta sirbi.
Na su personal dediká, pashèntnan balioso, i komunidat di Kòrsou: Curaçao Medical Center ta duna boso un gran Danki pa e konfiansa, sosten, i kolaborashon. Huntu nan ta resiliente. Huntu nan ta… Curaçao Medical Center.
