WILLEMSTAD, 20 di Ougùstùs 2024 – Curaçao Medical Center (CMC) ta sinti un obligashon pa atendé deklarashonnan inkorekto ku a wòrdu hasí dor di Minister di Salubridat i Finansa, Javier Silvania. Minister ta insinuá ku e no ta na altura di e informenan aktual i ta sugerí ku CMC no ta aktivamente trahando riba solushonnan pa e problema di lista di espera pa operashon elektivo.
CMC ke klarifiká e siguiente punto pa korigí informashon inkorekto i ta ofresé detayenan riba esfuersonan kontinuo:
1.Redukshon Signifikante den Lista di Espera pa Operashon Elektivo
CMC a hasi progreso signifikante pa redusí e lista di espera pa operashonnan elektivo. E lista, ku anteriormente tabata konsistí di kasi 3,000 pashènt, a baha i bira 1,191 pashènt for di 19 di ougùstùs, di kual 1,092 ta pashèntnan di SVB. E redukshon signifikante aki ta resultado di pasonan proaktivo dirigí na diferente retonan.
3.Komunikashon kontinuo ku Minister Silvania
Kontrali na e deklarashonnan di Minister, CMC a sigui ofresé e último informashonnan di e lista di espera riba un base semanal pa Inspektor i Minister Silvania. Minister Silvania ta risibí informashon detayá tur luna for di Sèptèmber 2022. E rapòrtnan aki ta demostrá klaramente e progreso i ku a logra redusí lista di espera. Alabes e rapòrt ta ofresé un bista transparente di e esfuersonan.
4. Konteksto i historia
Tin vários faktor krítiko ku ta influensiá e lista di espera largu. Esaki ta inkluí:
- Transishon di SEHOS: Un kantidat inisial di 800 pashèntnan a pasa durante e transishon di SEHOS na CMC.
- Pandemia di COVID-19: Operashonnan elektivo a para kuater bes durante e pandemia, resultando den un oumento di e lista di espera di 800 pa 2,000 pashènt.
- Eskases di Rekursonan: Durante e periodo di COVID-19, CMC a enfrentá eskases signifikante di material di sala di operashon i un eskases di asistentenan di sala di operashon ku a muda pa Hulanda. Esaki a krea un oumentu di lista di espera pa kasi 2,900 pashènt.
Pa atendé es retonan, CMC a tuma akshon desisivo pa reklutá i trese 7 asistente di sala di operashon for di Colombia na sèptèmber i òktober di aña pasá. E esfuerso aki a resultá di ta fundamental pa e progreso.
4.Dokumento di Desishon i Aprobashon di Stakeholder
E dokumento di desishon (inkluyendo 13 anekso) prepará pa e Gerensia di CMC, e direktiva di “Landelijke Vereniging Medische Professionals in Loondienst Curaçao” (LvMPiLC), SVB, i Inspektor di Salú, a ser aprobá riba 14 di yüni pa SVB i e Hunta di Direktiva. Miéntras, e direktiva di LvMPiLC a aprobá e dokumento inisial, esaki a kambia di opinion despues. E kambio aki no ta kambia e echo ku e dokumento a risibí e aprobashon nesesario i ta reflehá e esfuersonan kontinuo pa atendé ku e lista di espera na un manera efektivo. E inspektor a pidi un kambio den e “matrix” pero hunta di direktiva a indiká ku e kambio aki no por wòrdu hasí ya ku e ta kontra prinsipionan di “governance” di CMC.
Estado Aktual i Meta pa Futuro
E lista di espera pa operashonnan elektivo a baha di 2,742 pashènt den ougùstùs 2023 pa 1,191 den ougùstùs 2024. CMC ta proponé pa sigui redusí e sifra aki pa un máksimo di 600 pa 700 pashènt. Esaki ta kumpli ku e guia di Inspektor ku ta un máksimo di 7 siman di espera pa proseduranan elektivo.
Tantu inspektor komo Minister Silvania ta risibí informashon detayá tur siman for di sèptèmber 2022. E mail, inkluyendo e dashboard aki ta demostrá klaramente e progreso i ku a logra redusí lista di espera. Alabes e e-mail ta ofresé un bista transparente di e esfuersonan.
