WILLEMSTAD, 24 di yüli 2024 – E siman aki, Dr. Shirley Lo-A-Njoe, kardiólogo di mucha di Curaçao Medical Center (CMC) i Direktora di Ronald McDonald House Charities (RMHC) Kòrsou, Claudia Rigaud, a presentá i a forma parti di un pènel di ekspertonan na e konferensia global anual di RMHC na Chicago. Un grupo di boluntario di RMHC tambe a djòin na e konferensia pa mustra nan aporte i a waya e bandera di Kòrsou ku orguyo den e públiko.
E konferensia a enfatisá e importansia di Kuido sentralisá riba Famia (Family Centered Care). Esaki ta definí komo kuido diseñá pa i ku famia, respetando e ròl importante ku famia tin pa yuda e pashènt rekobrá i mantené su salú. Dr. Lo-A-Njoe i Señora Rigaud a kompartí logronan di CMC, ku énfasis riba e orario di famia ekstendé den departamentu di mucha. E orarionan nobo ta permití famia pa pasa mas tempu ku nan yu. “Mayornan no ta bishita; nan ta famia i parti di e proseso di rekuperashon,” Dr. Lo-A-Njoe a enfatisá. E pensamentu aki a inspirá diferente otro departamentu den CMC pa sigui e ehèmpel.
E konferensia global di RMHC tabata un oportunidat balioso pa selebrá logronan di e kolaborashon entre RMHC i CMC. Partisipantenan a uni pa tres dia pa siña, inspirá, i konektá ku otro koleganan di RMHC di mas di 60 pais. E konferensia di e aña aki tabata signifikante komo ku ta selebrá 50 aña di impakto di e mishon di RMHC for di e momentu ku e promé Ronald McDonald House a habri na Philadelphia na 1974. E evento a stimulá diskushonnan importante pa sigui duna servisio esensial ku ta kita bareranan, fortalesé famianan i promové rekuperashon ora muchanan mester di kuido.
