Willemstad, 20 di desèmber, 2022 – Den e siman ku a pasa 592 pashènt a akudí na departamentu di Emergensia na Curaçao Medical Center (CMC), di kual 97 (16.3%) mester a wòrdu hospitalisá. E situashon aki ta pone un preshon enorme riba e prosesonan logístiko. Kamanan di hòspital ta yenando mas lihé ku a spera i por resultá ku pashèntnan mester warda mas largu pa kama bira liber ora drenta hòspital.
Tin un oumento den e kantidat di trouma pa motibu di aksidentenan di outo pero tambe pashèntnan ku problema ku kurason. Banda di esaki, lokual ku ta pone preshon riba e departamentu di Emergensia i kousa hopi retraso promé ku por atendé ku pashènt ta e echo ku un gran kantidat di pashènt ta bin emergensia miéntras por a akudí na dòkter di kas den kasonan manera diarea, keintura òf grip, òf mucha ku asma.
CMC ke pidi komunidat pa selebrá e dianan di fiesta na un manera responsabel i tuma kontakto ku dòkter di kas si e malesa no ta un kaso di emergensia.
