Komishon nombrá pa hunta di komisario ta skohe Gilbert Martina komo CEO di Curaçao Medical Center

Willemstad, 5 di yüli, 2021 – Sr. Gilbert Martina, ku for di desèmber 2019 ta karga e funshon di interim CEO di CMC, a keda selektá komo e mihó kandidato pa duna guía na e hòspital. Gilbert Martina a wòrdu nombrá 1 di yüli pa un kontrakt di 4 aña. Su ròl ta inkluí maneho di operashonnan diario i pa balansá e défisit finansiero; pa desaroyá turismo médiko komo un forma di entrada pa CMC i pa haña akreditashon di JCI. E proseso di selekshon a kuminsá na ougùstùs di aña pasá i a wòrdu guiá pa un komishon ku a keda nombrá pa e Hunta di Komisario di CMC Exploitatie. Presidente di e komishon tabata prof. Dr. Ernst Kuipers, miembro di e Hunta di Komisario di CMC, CEO di Erasmus Medisch Centrum i presidente di e Landelijke Commissie Acute Zorg Nederland. Segun Kuipers : “Hunta di komisarionan ta sumamente satisfecho di por a apuntá Sr. Gilbert Martina komo CEO di CMC. Komo direktor interino, Gilbert Martina a guia CMC komo un eksperto durante di e periodo di inisio i tambe e pandemia resién di Covid. Nos ta desea Gilbert Martina, huntu ku tur koleganan di CMC, hopi eksito den e temporada benidero.  

Russel & Reynolds Associates, un ofisina mundial di konsulta, a sòru pa reklutashon i selekshon di e kandidatonan. E kantidat di kandidatonan a keda redusí te 4 i despues a sigui un proseso strikto pa garantisá ku e kandidato ku mas eksperiensia i konosementu di eksplotashon di un hòspital na Kòrsou lo keda selektá. E proseso a inkluí un profil pa e funshon di CEO ku a keda definí anteriormente, un longlist, un shortlist i un entrevista ku e miembro di e komishon di selekshon. 

Sr. Martina tin un MBA di Webster University na Leiden, un master den Chemical Engineering, un bachelor den Chemical Laboratory Engineering di Universidat di Amsterdam i un post graduado di Rijksuniversiteit Groningen pa HRM-veranderingsmanagement. Esaki tabata e fundeshi pa e eksperiensia amplio ku sr. Martina a haña den e 20 añanan ku a sigui. 

Promé ku e funshon di interim CEO na CMC, sr. Martina tabata responsabel durante dos aña – di òktober 2017 pa 2019 – pa e traspaso di e hòspital bieu (SEHOS) pa esun nobo (CMC). Su logronan ta inkluí: re-inisiashon di e programa di transishon ku tabata on hold pa motibu di konfliktonan entre partidonan, desaroyo di e modèl i vishon di kuido pa un sistema di salú kompleto pa Kòrsou ku partisipashon di tur stakeholder relevante, desaroyo di un struktura i funshonnan di organisashon, asigná tur trahadó di struktura di organisashon di SEHOS pa e struktura di organisashon di CMC, desaroyo di modelonan operashonal finansiero pa CMC Exploitatie i CMC Real Estate i desaroyo i aprobashon di un struktura di tarifa nobo di CMC. 

Su karera i eksperiensia ta inkluí varios funshon den e industria kímiko, timnan di maneho di kompanianan di seguro i otro instansianan finansiero kaminda e fokùs tabata dirigí riba programanan di kambio di maneho i e guia di timnan ku ta responsabel pa tantu e operashonnan diario komo e programanan di kambio. 

Den su ròl na CMC komo interim CEO entre desèmber 2019 pa awor, sr Martina a inisiá e proseso di akreditashon di JCI, lokual lo buta e hòspital riba mapa komo un di e tiki hòspitalnan ku ta akreditá pa JCI den Karibe. Esaki lo ta un logro importante pa e hòspital i tur su klientenan, pero tambe pa Kòrsou komo pais. 

Sr. Martina ta duna di konosé ku ta un honor ku e la keda elehí pa e funshon aki. Na mucha mi tabata bishitá e departamentu di dermatologia di poliklínika di SEHOS frekuentemente, mirando ku mi mama tabata laborá einan komo asistente médiko. Mi promé eskoho despues di finalisá skol sekundario, tabata pa studia medisina na Hulanda, pero den mi promé aña no tabata tin lugá, pues mi a opta pa mi di dos eskoho: kímika. Mi tin un background beta, pero den transkurso di añanan mi a siña ku ‘people management’ den kombinashon ku un vishon i metanan fuerte, ta e yabi pa eksito organisatorio. Lo ta un reto grandi pa trese un balansa den e defisit finansiero i pa implementá nos slogan ‘Sirbi ku Amor’ den e DNA di tur trahadó, pero na final mi ta konvensí ku esei ta lokual tur kliente di CMC ta meresé; pa keda sirbí for di kurason, ku pashon i hopi amor. 

CMC ta kontentu ku e biahe ku tin su dilanti huntu ku sr. Martina pa sigui alsa e kalidat di kuido i pa buta Kòrsou riba mapa komo un sentro pa kuido médiko eksepshonal. 

Leave a Reply

Your email address will not be published. Required fields are marked *