Willemstad, 19 di Òktober 2023 – Curaçao Medical Center (CMC) ta rekonosé e desafionan ku e ta enfrentá pa por entregá servisio di kuido efisiente i ta trahando na un manera proaktivo pa solushoná e problemanan aki i sigurá un nivel haltu di kuido di pashènt. Un di e preokupashonnan mas signifikante ku pashèntnan a ekspresá, ta e tempu largu di espera pa por haña un sita pa sea konsulta of operashonnan elektivo. E spesialismonan ku ta enfrentá un tempu di espera mas largu pa sita na poliklínika ta inkluí Oftamología, Nefrología, Ortopedía, Medisina Interno, Pulmonología, Urología i Neurología. Un oumento den e kantidat di pashèntnan ku mas o ménos 10% durante e último 3 añanan, kombiná ku e reto di reklutá spesialistanan nobo komo konsekuensia di e lei di LNT, a empeorá e problema.
Por ehèmpel, e departamento di Neurología tabata limitá den traha sita pa pashènt mas leu ku 6 siman debí na e salida di dos spesialista na komienso di e aña aki. Oftalmología a sufri pa medio di un eskases di oftalmólogonan. Alabes e hecho ku spesialistanan yu di tera a disidí pa no bolbe nos isla despues di a informá nan mes tokante e lei nobo di LNT, a empeorá e situashon. Den Ortopedía, un spesialista a tuma retiro i e departamentu di Kardiología ta enfrentá un oumento alarmante di pashènt ku ta sufri di malesanan kardiovaskular. Esaki ta pa motibu ku e poblashon di Kòrsou ta eksperensiá un kresementu signifikante den problema ku preshon. Aktualmente e kantidat di hende ku preshon na Korsou ta mas o ménos 50% di e poblashon. Medisina interno tambe ta enfrentá desafionan. Pa loke ta trata Diabétis, esaki ta afektá 30% di nos poblashon.
CMC ta komprometé su mes pa solushoná e problemanan ku ta den su alkanse. Pa aliviá e karga riba e lista di espera, e poliklínikanan ta trahando duru pa optimalisá oranan di konsulta. Además, e departamento di Rekurso Humano ta hasiendo tur su esfuerso pa kontratá spesialistanan nobo i otro koleganan den kuido pa reforsá e tim di CMC.
Pa loke ta trata operashonnan, Ortopedia, Oftalmologia, i Sirugia general a konfrontá mas tantu retraso.
E eskases di asistente di sala di operashon tambe tabata un desafio grandi pa sirugia general. Pa aliviá e situashon aki, CMC a logra di kontratá 6 asistente di sala di operashon adishonal. Esaki lo yuda pa por operá tur 7 sala di operashon. Departamentu di planifikashon lo kuminsá tuma kontakto ku pashèntnan ku ta riba e lista di espera den e próksimo simannan pa traha un sita pa operashon.
E aña aki, te ku final di sèptèmber, CMC a atmití un total di 14,643 pashènt, ku a keda hospitalisá pa un promedio di estadia di 2.8 dia. Pa sigui honrá CMC su kompromiso pa transparensia i komunikashon habrí ku pashènt i komunidat, CMC lo publiká e promé infografía ku datonan analítiko otro siman. Esaki lo duna un bista general di e servisionan di hòspital inkluyendo, entre otro, departamentu di Emergensia, poliklínika, i kantidat di operashonnan
