WILLEMSTAD, 19 di yanüari, 2026 – Pa garantisá seguridat di pashènt i komo medida di prekoushon, Curaçao Medical Center (CMC) lo reprogramá tur sirugia elektivo pa e siman aki debí na un problema ku e ekiponan di laba i sterilisá instrumentonan di operashon den e departamentu di sterilisashon. Tur operashon urgente i agudo lo sigui manera planiá. Esaki ta posibel dor di kolaborashon estrecho ku partnernan regional ken ta yuda ku e proseso di sterilisashon.
Tur pashènt afektá pa e situashon aki a òf lo wòrdu yamá direktamente dor di e Departamentu di Planifikashon pa asina plania un fecha nobo pa operashon.
E ekiponan di sterilisashon aktualmente ta funshoná pero no optimal. Esaki ta kousa resultadonan inkonsistente. Komo ku sterilidat no por wòrdu garantisá kompletamente bou di e kondishonnan aki, CMC a disidi di no usa e ekipo te ora ku e situashon wòrdu resolvé.
Debí na garantía di e ekiponan, e kompania ku ta bende e ekiponan aki tin un representante na kaminda pa asina evaluá i atendé e problema. Fin di siman aki lo sali un “update” tokante sirugianan elektivo planiá pa otro siman.
CMC ta yama danki na e empleadonan den Departamentu di Sterilisashon i Téknologia Médiko pa nan esfuersonan eksepshonal i nan dedikashon durante e periodo aki. Tambe ta gradisí pashèntnan i komunidat pa nan komprenshon. Siguridat di pashènt ta keda e prioridat di mas haltu.
