Willemstad, 1 di desèmber 2025 – Pashèntnan di kanser di Curaçao Medical Center (CMC) awor por kuminsá nan tratamentu mas lihé, ku mas presishon i ku ménos efekto lateral, danki na un adelanto teknológiko grandi den radioterapia. Riba 24 di novèmber, CMC a introdusí un plataforma nobo i state-of-the-art pa planifikashon di tratamentu ku ta usa inteligensia artifisial (AI). Ku esaki, CMC a bira e promé hòspital den region ku ta implementá e teknologia aki i ta djòin otro institutonan avansá manera Netherlands Cancer Institute na Amsterdam i Noordwest ziekenhuis Groep na Alkmaar. E sistema, Elekta One, ta wòrdu dirigí pa e ekosistema avansá di MIM Software.
Pa e pashèntnan, e impakto ta direkto i signifikativo. E tempu entre e skèn di CT i inisio di e tratamentu di radioterapia awor ta hopi mas kòrtiku. Pues e tratamentu por kuminsá mas trempan i asina redusí e ansiedat ku hopi biaha ta kompañá un diagnósis di kanser. “Nos meta ta simpel,” asina Lucien Zuiverloon, Koordinadó di Radioterapia, a bisa. “Nos ke pa pashèntnan kuminsá tratamentu mas lihé i ku e konfiansa ku nan plan ta mas dirigí (presiso) posibel.”
Whitney Coulor, Físiko Médiko, a splika e benefisio klíniko: “AI ta permití nos protehá órganonan salú muchu mihó, asta e tehidonan mas chikitu manera nódulonan linfátiko i adernan. Ora nos por mira e strukturanan aki mas kla, nos por dirigí e ekipo pa duna e dosis di radiashon mas abou posibel na e áreanan salú. Esaki ta nifiká ménos efekto lateral i un mihó kalidat di bida pa nos pashèntnan.”
E upgrade di Elekta One + MIM a wòrdu instalá pa téknikonan di Elekta den kolaborashon ku e Departamentu di IT, Departamentu di Físika Médiko, Teknologia Médiko i e Tim di Radioterapia. E upgrade aki tambe ta prepará Kòrsou pa e siguiente generashon di akseleradornan linear i téknikanan di radioterapia avansá.
“Pa Kòrsou ta entre e proménan den Latino Amérika i Karibe pa adoptá e teknologia aki ta demostrá nos kompromiso ku kuido di kanser di klase mundial, netamente aki na kas,” Zuiverloon a agregá. “Pashèntenan meresé e mihó di e mihó, i e upgrade aki ta yuda nos duna esei.”
Pa mas detaye di esaki, sigui e Podcast ku lo ta riba e página di Facebook di Curaçao Medical Center entrante 1 di desèmber 2, 8:00 P.M
