WILLEMSTAD, 8 di yanüari 2026 – Despues di un búskeda ekstenso, Curaçao Medical Center (CMC) ta anunsiá Drs. Ludmilla Garmers, un yu di tera, komo e Direktor Médiko nobo. Drs. Garmers ta regresá kas pa trese un gran konosementu den edukashon médiko, liderazgo di hòspital i kuido agudo pa e sistema di kuido lokal.
Ku un karera remarkabel kual ta inkluí na kabesante di Departamentu di Anestesiologia i Maneho di Doló, sirbi den direktivanan di hòspital i liderá e Hunta di Konseho di Spesialistanan Médiko, Drs. Garmers ta konosí pa su maneho kolaborativo i transparente. E ta sobresalí den guia timnan den kambionan den organisashon miéntras e ta mantené seguridat di pashènt i kalidat di kuido na promé lugá.
Drs. Garmers lo asumí su puesto ofisialmente e siman di 30 di mart 2026 i CMC ta ansioso pa su liderazgo pa sigui avansá e mishon di e hòspital di duna kuido seif, efisiente i di kalidat haltu.
CMC su enfoke e aña aki, ta riba fortalesé su fundeshinan operashonal i sigui mehorá e kalidat di servisio i prosesonan médiko,” asina Filia Kramp, Presidente di e Hunta di Supervishon a bisa. “Drs. Garmers su ekspertisio i vishon lo ta di gran balor mientras nos ta sigui traha riba nos progreso.”
Komo parti di e esfuersonan kontinuo pa mehorá akseso na kuido, CMC a redusí su lista di espera pa operashon na ménos ku 600 pashent. Esaki ta un bahada for di e 2.600 pashèntnan ku tabatin algun aña pasá. Esaki ta reflehá e enfoke fuerte di e hòspital riba efisiensia i un kuido sentrá riba e pashènt.
E miembro di Gerensia responsabel pa finansas i asuntunan operashonal no a ser nombrá ofisialmente ainda. Hunta di Supervishon ta finalisando e proseso aki i lo duna un aktalisashon den e próksimo simannan.
