Willemstad, 31 di mart 2025 – Curaçao Medical Center (CMC) ta anunsiá ku Sr. Johan de Graaf lo asumí su ròl ofisial komo Direktor General di CMC entrante 1 di aprel, 2025. Esaki ta marka un stap importante pa e hòspital i ta reforsá e kompromiso di CMC na ekselensia den kuido.
Pa sigurá kontinuidat i un transishon eksitoso, Direktor General saliente, Sr. Gilbert Martina, lo ta presente físikamente te ku 31 di mart. Despues di esaki, e lo ta disponibel “remote” pa konsulta ku Sr. de Graaf te ku 30 di yüni, 2025, pa duna aporte i orientashon durante e periodo di transishon. Sr. de Graaf lo kuminsá inmediatamente ku reunionnan ku partnernan prinsipal i lo programa tempu pa konektá ku kada departamentu den CMC. Su promé luna el lo dediká na konosé e ekiponan interno i integrá den kultura di e organisashon.
CMC ta mantené su kompromiso pa trata tur desafionan, inkluyendo sigui mehorá eksperensia di empleadonan i pashèntnan, redusí lista di espera, i sigui mehorá kalidat di kuido. Bou di liderazgo di Sr. de Graaf, CMC lo sigui boga pa ekselensia operashonal i atenshon sentral na pashènt.
CMC ta ekspresá un danki profundo na Gilbert Martina pa su liderazgo, dedikashon, i kontribushon importante durante su periodo komo Direktor General. Su esfuerso a pone un fundeshi fuerte pa e futuro di CMC, i nos ta apresiá su guia kontinuo durante e transishon.
Pa introdusí Sr. de Graaf ofisial na komunidat, CMC lo plania un Konferensia di Prensa pa fin di mei. Esaki lo duna Sr. de Graaf e oportunidat pa kompartí su bista i meta pa e futuro di kuido na CMC. Detayenan adishonal lo wòrdu kompartí den e próksimo luna. Entrevista ku prensa lo ta posibel despues di e fecha aki.
