WILLEMSTAD, 22 di Novèmber 2024 – Curaçao Medical Center (CMC) ta deseá di klarifiká e rason pa kual a tuma e desishon di retirá su kaso hudisial kontra di Inspekshon di Salubridat. E kaso a ser inisiá unikamente pa haña akseso na dokumentonan krítiko i un grabashon den poder di Inspekshon. Esakinan tabata nesesario pa CMC por a hasi un investigashon profundo riba un kaso di pashènt andando.
Teniendo kuenta ku Inspekshon di Salubridat a kumpli boluntariamente ku e petishon di CMC i proveé e dokumentonan akí, no ta nesesario mas pa CMC sigui ku e kaso. E desishon pa retirá e kaso a wòrdu tumá den kuadro di e desaroyo aki i no mester keda interpretá komo un pèrdida òf falta di mérito. Al kontrario, CMC a risibí e dokumentonan pidí. E resultado aki ta permití CMC pa mantené su kompromiso ku transparensia i responsabilidat.
