Willemstad, 7 di Sèptèmber 2022 – Pa prevení infarto serebral, Curaçao Medical Center (CMC) a kuminsá skrin tur mucha ku e malesa di sikel sèl mas regular. Esaki ta tuma lugá usando un Dòpler transkraneal (TCD), kual ta un método de skrin ku un mashin di ultrasonido ku ta midi e velosidat di e fluho di sanger den ardunan grandi di e seleber. E método di investigashon akí ta seif paso e no ta emití radiashon òf hasi daño na muchanan. Nan lo mester solamente deskansá un ratu.
E malesa di sikel sèl ta un kondishon heredá ku ta pone ku e sèlnan di sanger kòrá ta mustra diferente, den forma di un sikel òf forma di un (kuart) luna. Den termino largu esaki por kousa problemanan ku kasi tur organo den kurpa di un mucha òf adulto. Un konsekuensia importante pa para ketu na dje ta ku e malesa por kousa ku ardunan ta blòkia. Na momentu ku esaki pasa den selebre e yama infarto selebral òf CVA (cerebrovascular accident).
Investigashonnan ta indiká ku mas ku 11 % di e pashèntnan ku sikel sèl ta eksperensia un infarto selebral promé ku nan hasi 20 aña, di kua mayoria ta entre e edat di 1 i 5 aña. Den e último tempunan, mas ku 25% (pues 1 den kada 4 adulto ku e enfermedat aki) lo eksperensiá un infarto selebral.
Sin embargo, una proporshon grandi di muchanan ku e enfermedat aki ta eksperensiá un “infarto silensioso”. Estudionan sientífiko ta demonstrá ku esaki ta e kaso ku 21% di e muchanan. Debí na e “infarto silensioso,” nan no ta sinti un parálisis manera un infarto selebral, pero nan por keda ku retraso den desaroyo òf ku nan prestashon na skol.
For di e aña akí, tur mucha ku enfermedat di sikel sèl ta wòrdu di skrin den e departamentu di Funshon (Funktie) di CMC. Sra. Elisabeth Kroone, Hefe na e Klínika di Neurofisiologia (KNF) ta hasi esaki tur siman bou di guia di Meindert Manshande, dòkter di mucha i kordinadó di malesa di sikel sèl den mucha.
E tim ta orguyoso di por konta ku e proseso aki. “E malesa di sikel sèl ta un enfermedat ku ta debilitá un mucha. Na CMC nos ta hasi tur kos posibel pa e muchanan por biba un bida ku ménos keho i mas ku nan por sinti nan mes un tiki mas mihó. Awendia, tin mas opshon disponibel pa muchanan ku sikel sèl. E parti di skrin usando e método di TCD mes ta kontribuí na esaki i a bira un parti indispensabel di e kuido di sikel sèl “ Dr. Manshande ta bisa.
Pa último desaroyonan di CMC, sigui página di Facebook di Curaçao Medical Center.
