Willemstad, 3 di febrüari, 2022 – Entrante di djaluna, 7 di febrüari, Curaçao Medical Center (CMC) lo kuminsá bèk ku operashonnan elektivo pa pashèntnan riba lista di espera, konsistiendo di 1,834 pashènt. Departamentu di planifikashon lo tuma kontakto ku tur pashènt pa kordiná nan fecha pa operá. Ta trata di e operashonnan ku a keda posponé pa motibu di e kantidat di pashèntnan ku COVID-19 den hòspital i e kantidat di koleganan ku tabata den isolashon. Entretantu, mayoria kolega a regresá trabou.
CMC ta start bèk ku koutela mirando ku e preshon ta sigui riba kuido intensivo ku 10 pashènt ku COVID-19 inkluso esnan ku no ta positivo mas, pero mester keda hospitalisá pa motibu di nan situashon delikado.
Ademas, CMC a tuma e desishon pa normalisá oranan diario di bishita pa 11or di mainta pa 1or di mèrdia i 5or di atardi pa 7or di anochi. Ta permití solamente 2 bishita pa kada pashènt, teniendo kuenta ku mester bisti tapa boka i no por bishitá si tin síntoma di COVID-19.
Pa último desaroyonan di CMC, sigui página di Facebook di Curaçao Medical Center.
