WILLEMSTAD, 4 di febrüari 2025 – Hunta di Supervishon ta kontentu di anunsiá Sr. Johan de Graaf komo e Direktor General nobo, entrante 1 di aprel 2025. E transishon di liderazgo aki ta krusial ya ku CMC ta sigui fortalesé su kompromiso pa duna kuido di kalidat haltu na e komunidat di Kòrsou. Sr. Gilbert Martina lo renunsiá dia 30 di yüni 2025 na momentu ku e alkansá e periodo máksimo di 8 aña pa su nombramentu.
Komo parti di e transishon di liderazgo ku tu tumando luga, Hunta di Supervishon ta reflehá riba e kontribushonnan di Sr. Martina i e kaminda pa dilanti ku Sr. de Graaf.
“Ta ku sintimentunan miksto Hunta di Supervishon ta kompartí ku boso e kambio den e presidensia di e Direktor General di CMC. Di un banda e despedida di Sr. Gilbert Martina no ta fasil pa nos. El a dirigí CMC pa 8 aña. Esaki tabata 8 aña remarkabel, spesialmente pa motibu di e pandemia di COVID-19 ku a marka e komienso di e hòspital nobo, pero tambe pa motibu di e liderazgo inspirativo di Sr. Martina, bou di kua CMC por a enfrentá e krísis. Banda di esei CMC a konfrontá difikultatnan finansiero, ku te ainda ta tumando luga. Kòrsou awor tin un hòspital nobo i moderno, pero finansieramente ainda e tin ku opera bou di un kuadro regulatorio antikuá. Esaki ta krea tenshon i ta stroba e ambishonnan di e pais. Ta trahando pa aktualisá e kuadro aki i nos tin konfiansa ku e resultado lo ta benefisioso pa un i tur, spesialmente e komunidat di Kòrsou, pasobra ta pa esei nos tei. Lo duna Sr. Martina un despedida públiko apropiá mas den transkurso di e aña aki.
Di otro banda, Hunta di Supervishon tin konfiansa den e nombramentu di Sr. Johan de Graaf komo Direktor General nobo. Nos a haña un Direktor General nobo digno di Sr. Johan de Graaf. Un Direktor General ku lo sostené loke sr. Martina i su tim di maneho a logra durante e último 8 añanan, na su manera, pero tambe introdusí inovashonnan. Un di e prioridatnan klave di Sr. de Graaf ta su kompromiso pa kompartí mas tantu di su ekspertisio komo gerente di hòspital ku potensialnan haltu denter di CMC. Di e manera aki, Hunta di Supervishon ke sòru ku e próksimo vakatura di CEO lo inkluí kandidatonan kualifiká i dispuesto for di den CMC, en partikular un yu di Kòrsou. Nos ta yama Sr. de Graaf bon biní!”
Sr. Johan de Graaf tin mas ku 35 aña di eksperensia komo lider di organisashonnan di kuido, ku un estilo di liderazgo basá riba integridat i kolaborashon. Durante henter su karera, e tabata komprometé na mehorá kuido, promové inovashon i enkurashá dinámika fuerte denter di tim. Posishonnan anterior ku el a okupá ta inkluí miembro di e hunta di direktiva di grupo di kuido ZorgSaam i liderando vários proyekto di kuido denter di e sektor di defensa. Sr. De Graaf ta bon posishoná pa hiba CMC den su siguiente fase, kombinando su eksperensia amplio ku su kompromiso pa sostené talento lokal i konstruí un futuro fuerte pa CMC.
Hunta di Supervishon i CMC ta ekspresá nan sinsero gratitut na sr. Gilbert Martina pa su esfuersonan dediká komo CEO. Bou di su liderazgo, CMC a hasi progreso remarkabel pa bira un lider den fasilidat di kuido den Karibe. Su kompromiso i kontribushonnan kontinuo tabata krusial pa e kresementu i stabilidat di e hòspital. Sr. Martina ta wak bèk riba su periodo komo Direktor General:
“Tabata un berdadero plaser pa mi por a dirigí e formashon i komienso di e hòspital general nobo di Kòrsou durante e ultimo 8 añanan. CMC ta un hòspital ku e empleadonan i habitantenan di Kòrsou por ta orguyoso di dje. Apesar di tur e retonan ku a presentá na kaminda, manera e finansiamentu adishonal di ANG 200 mion durante e periodo di transishon, e optimalisashon di diagnóstiko di laboratorio mesora despues di e apertura, e pandemia di COVID-19 for di mart 2020, un presupuesto di kuido insufisiente di un promedio di ANG 50 mion, un skarsedat di trahadónan di kuido i e introdukshon di e lei di LNT, ku tabatin un impakto grandi riba e retenshon, reklutamentu i selekshon di spesialistanan médiko, CMC a duna kuido hospitalario na tur ku tabatin mester di dje. E promedio di 8.5 pa satisfakshon di pashènt i un tasa di mortalidat di 2.5% pa fin di 2024 ta indikadónan klave di e logro kolektivo eksepshonal aki. Nos tur por ta orguyoso di CMC, pa Kòrsou i Karibe, tin un hòspital! Mi ta entregá e presidensia na Johan ku hopi konfiansa i mi ta konvensí ku e por realisá e rumbo stipulá pa hasi CMC e mihó hòspital den Karibe dor di, entre otro, optené e akreditashon prestigioso di JCI. Sinembargo e no por hasi esaki su so i e mester di sosten di tur stakeholder interno i eksterno. ‘Si bo ke bai lihé, bai bo so, si bo ke bai leu, bai huntu’ – un dicho bieu afrikano. Nos ke yega mas leu posibel pues nos tin ku sigui e trayekto aki huntu.”
Sr. de Graaf a ekspresá su kompromiso ku futuro di CMC i a enfatisá e responsabilidat i balornan ku lo guia su liderazgo:
“Komo preparashon pa e funshon honorabel aki, mi a wòrdu informá profundamente riba e retonan ku a surgi i ta sigui surgi diariamente. Mi tin un atmirashon imenso pa e logronan di Curaçao Medical Center i pa e dedikashon di tur su empleadonan, den tur ròl, ku ta dediká tur dia pa hasi nan máksimo esfuerso pa duna kuido di kalidat di mas haltu posibel na tur habitante ku ta dependé di dje. E responsabilidat pa kolektivamente duna e mihó kuido posibel na esnan ku ta vulnerabel pa motibu di malesa òf leshon, ta e forsa impulsivo den mi karera i lo keda mi enfoke komo un kolega nobo na CMC. For di promé instante mi a eksperensiá den vários ròl, ku e responsabilidat aki por ta eksigente i tin bia por kousa strès. E eksperensianan aki a reforsá mi kontundensia ku konfiansa, ta habri i integridat ta balornan esensial pa promové kolaborashon fuerte. Na mes momentu, mi tin ‘big shoes to fill’ ora mi wak e logronan i dedikashon di Gilbert. E retonan pa garantisá kontinuidat di kuido den e hòspital vital aki pa Kòrsou i region ta signifikante. Mi ta kompletamente komprometé na usa mi eksperensia i energia pa e hòspital i su hendenan Esaki ta enserá tambe maneho di suseshon, edukashon i desaroyo di talento lokal, pa bira futuro lidernan trahando huntu ku tur empleado di CMC. Mi ta spera di mira bo pronto!”
E transishon aki ta marka un kapítulo nobo i emoshonante pa CMC. Segun ku hòspital ta kontinuá ku su mishon pa duna kuido ekselente na komunidat di Kòrsou, Hunta di Supervishon i personal tin konfiansa den e liderazgo i vishon ku Sr. de Graaf lo trese. CMC ta komprometé na fortalesé su posishon komo un lider den dunadó di kuido di salú den Karibe i e futuro ta mustra briante bou di e liderazgo nobo aki.
