Willemstad, 4 di yüni 2025 – Curaçao Medical Center (CMC) ta komprometé na ofresé kuido di nivel haltu, aksesibel i ku pashènt sentral, pa komunidat. E esfuersonan aki ta inkluí sigurá ku tin sita disponibel, redusí lista di espera, mehorá komunikashon entre e hòspital i proveedornan primario di kuido (Dòkternan di kas), i duna kuido ku empatia ku enfoke riba e nesesidatnan di pashèntnan i nan famia.
Pa logra e metanan aki, hunta di direktiva pa vários aña kaba ta aktivamente implementando un seri di medidanan pa fortifiká e operashonnan i optimalisá e manera ku kuido ta wòrdu duná. E proseso aki ta envolví evaluashon profundo, restrukturashon kaminda ta nesesario i introdukshon di responsabilidat na tur nivel di kuido.
“Nos ta rekonosé ku e transishon aki a kousa frikshon i inkomodidat entre algun stakeholder, pero e nesesidat pa reforma ta esensial i ta riba mesun liña ku nos mishon pa ofresé e mihó kuido posibel na pueblo di Kòrsou,” segun gerensia.
Un di e áreanan ku a eksigí desishonnan difísil ta relashoná ku kumplimentu ku lei LNT (Lei pa Standardisashon di Salario Haltu den Sekshon Públiko), ku ta den vigor for di 2023. Gerensia di CMC a buska repetidamente via proseso legal pa un interpretashon òf aplikashon diferente di e lei aki den kaso di spesialistanan médiko. Sinembargo, desishonnan resien di korte a deklará ku e lei ta obligatorio i mester wòrdu apliká den su totalidat.
“Nos ta komprondé plenamente ku e desaroyonan aki a tene un impakto personal i profeshonal riba nos spesialistanan médiko,” segun gerensia. “Esaki no ta tempu fásil i e desishonnan tampoko. Nos ta respetá e dedikashon di nos spesialistanan i ta rekonosé e ròl vital ku nan tin den kuido. Aunke nos mester sigui e lei, nos ta komprometé pa sigui traha huntu—den un manera konstruktivo i ku rèspèt—pa sigui sirbi pueblo di Kòrsou ku kompashon i ekselensia.”
“Nos ta hasi nos máksimo pa sirbi nos komunidat na e mihó manera posibel, den nos alkanse i den kuadro di lei,” segun gerensia.
Komo un institushon ku ta finansiá públikamente, CMC tin un obligashon legal i étiko pa aktua konforme lei di Pais. E desishon pa implementá e ahustenan finansiero—aunke difísil—tabata den un kuadro legal i despues di hopi prosedimentu legal. No tabata un eskoho, sino un responsabilidat.
Durante e proseso aki, gerensia a keda enfoká riba e meta prinsipal: pa sigurá ku Curaçao Medical Center ta sigui desaroyá komo un hòspital modèrnu, ku ta funshoná na un nivel haltu, kaminda kuido di pashènt no solamente ta mantené, pero tambe mehorá.
Gerensia ta gradisí komunidat pa su komprenshon i ta sigurá pashèntnan, stakeholdernan i personal ku lo sigui traha pa optimalisá i sigui krea un sistema di kuido sostenibel i transparente ku ta sirbi tur hende den un manera hustu i responsabel.
Hunta di Direktiva CMC
