Willemstad, 15 di febrüari, 2023 – 15 di febrüari ta dia internashonal pa kanser di mucha. E aña aki, nos ta pone énfasis riba famia i personanan ku ta duna guia durante e proseso i e impakto positivo ku nan tin riba e mucha i adolesentenan ku kanser. Pa sobrebibí kanser serka mucha ta rekerí un esfuerso konhunto. For di e spesialistanan na Curaçao Medical Center (CMC) ku ta detektá e kanser, e guia ku e mucha i su mayornan ta risibí durante e proseso médiko, pa sosten moral i emoshonal ku e mucha i henter famia ta risibí di parti di Ronald McDonald House of Charities (RMHC) i Stichting Prinses Wilhelmina Fonds (SPWF).
Tur 15 di febrüari, un kampaña kolaborativo di konsientisashon pa kanser di mucha ta tuma lugá pa ekspresá sosten na muchanan, adolesentenan ku kanser, sobrebibientenan i nan famianan. E aña aki CMC a bai LIVE riba nan página di Facebook ku kombersashonnan kòrtiku ku spesialistanan, pashènt ku a sobrebibí i organisashonnan ku taduna sosten kual ta, RMHC i SPWF. E entrevistanan lo keda riba página di Facebook pa bo por wak.
Parti mèrdia, RMHC i SPWF a invitá pashèntnan ku kanser i pashènt ku a sobrebibí kanser pa disfrutá den RMHC family room na CMC. Den kolaborashon ku Museo di mucha Kòrsou ku nan programa di “Museum on the Go”, a organisá un atardi di alegria pa tur famia lokal, kaminda nan por bini huntu, interkambiá eksperensianan i tambe selebrá bida.
