Willemstad, 14 di òktober 2026 – Diesun pashènt ku gloukoma a hasi un operashon di wowo nobo na Curaçao Medical Center (CMC), dunando nan un speransa pa konservá nan bista. Tur 11 pashènt a mustra un bon bahada di preshon den wowo despues di e operashon. Durante e operashonnan ku a tuma lugá siman pasá, a usa e implante EyePlate 300-S pa di promé biaha den Karibe.
Gloukoma ta un malesa di wowo ku por kousa pèrdida permanente di bista òf asta por bira siegu, hopi biaha sin ku e persona ripará síntoma. Ora un persona pèrdè su bista pa motibu di gloukoma, e no por rekuperá su bista. Pa pashèntnan ku gloukoma, un operashon por ta nesesario pa baha e preshon den wowo i prevení mas daño.
E operashonnan a wòrdu realisá pa oftalmólogo (dokter di wowo) di CMC, Dr. Michael Siban, huntu ku Dr. Gyan Soerjoesing, kende a biaha for di Hulanda spesialmente pa e mishon di operashon aki. E implante EyePlate 300-S ta yuda saka e ekseso di líkido for di wowo, ku ta baha e preshon i protehá e nèrvio óptiko kontra mas daño. E tratamentu aki ta ofresé un opshon adishonal pa pashèntnan ku nan preshon di wowo no por wòrdu kontrolá sufisientemente ku remedi òf otro tratamentu.
Pa por introdusí e tratamentu aki na Kòrsou, vários aña di preparashon tabata nesesario. Dr. Siban a kompletá tambe un formashon spesialisá den tratamentu di gloukoma, ku e meta di por realisá e operashonnan aki di forma independiente na CMC den futuro. Esaki lo permití ku mas pashènt por risibí tratamentu spesialisá aki mes na Kòrsou, sin tin ku biaha pa eksterior pa sierto prosedura.
Gloukoma ta preokupashon di atenshon spesial na Kòrsou. Personanan di desendensia Afro-Karibeño i esnan ku tin famia ku gloukoma tin un riesgo mas haltu pa desaroyá e malesa aki. Segun Dr. Siban, hopi biaha ta deskubrí gloukoma serka pashèntnan ora e malesa ya ta den un fase avansá.
Maske tratamentunan nobo ta ofresé speransa pa pashèntnan ku gloukoma (avansá), deskubrí e malesa na tempu ta keda e mihó manera pa protehá nos bista. CMC ta enkurashá komunidat, spesialmente personanan di 35 aña òf mas ku tin gloukoma den famia, pa laga kontrolá nan wowonan regularmente. Un dòkter di wowo por indiká kua eksámen ta nesesario i ku ki frekuensia mester hasi nan.
