Willemstad, 7 di òktober 2026 – Curaçao Medical Center (CMC) ta logra redusí e lista di espera pa operashon. E lista a baha di mas o ménos 1.070 pashènt na Sèptèmber te na 733 e siman aki. Pero na mes momentu, e kantidat di pashènt ku ta yega na Emergensia ta sigui oumentá, poniendo mas preshon riba e kambernan di hòspital, salanan di operashon i kapasidat di personal di enfermeria.
Durante e promé nuebe lunanan di 2026, CMC a atendé 18.236 pashènt na Emergensia. Esaki ta kasi 10% mas ku den e mesun periodo di 2025 i kasi 15% mas ku na 2024. Di e pashèntnan aki, 5.096 mester a keda interná den hòspital. Esaki ta nifiká ku tur dia, na promedio, mas o ménos 19 pashènt ta yega via Emergensia i inesperadamente mester un kama den hòspital.
E situashonnan di emergensia aki no por wòrdu planiá. Ora un pashènt di emergensia mester un operashon òf mester keda interná inmediatamente, su kuido mester haña prioridat. Pero e mesun salanan di operashon, kambernan i profeshonalnan di kuido ta nesesario tambe pa e pashèntnan ku tin un operashon planiá. P’esei, ta pasa ku operashonnan planiá mester wòrdu posponé na último momentu pasobra un pashènt di emergensia mester di e kapasidat ei.
Ora mas ku 85% di e kambernan den e departamentunan general di enfermeria ta okupá, por pasa ku pashèntnan mester warda mas largu pa un kama òf keda interná den un departamento ku no ta e mas apropiá pa nan kondishon médiko. Esaki ta kousa retraso tambe pa interná pashèntnan ku ta bin di Emergensia i ta oumentá e posibilidat ku operashonnan planiá mester wòrdu posponé.
CMC a tuma diferente medida pa mehorá e fluho di pashèntnan i pone kama disponibel. Un di e áreanan ta relatá na pashèntnan ku, segun evaluashon médiko, por sali for di hòspital, pero ainda ta warda pa un lugá den un kas di kuido, hospice òf otro sentro di kuido. E kantidat di e pashèntnan aki a baha di mas o ménos 29 na mei e aña aki te na 10 e siman aki. Esaki ta un progreso konsiderabel ku yudansa di SVB i e diferente partnernan envolví. Sinembargo, den un hòspital ku ta funshoná kasi na su kapasidat máksimo, kada kama ku por habri pa un ku mester kuido spesialisá ta hasi diferensia.
E datonan di CMC di 2026 ta mustra tambe ku mas o ménos 59% di e pashèntnan ku ta yega na Emergensia ta bin di nan mes, sin ku nan médiko di kas òf Huisartsenpost (HAP) a manda nan, i sin ku ta trata di un aksidente ku a rekerí transporte ku ambulans. Na sèptèmber, di e total, mayoria di e bishitanan na Emergensia tabata relashoná ku malesa òf un kondishon médiko eksistente. Heridanan i aksidentenan di tráfiko tambe a kontribuí na e demanda di kuido di emergensia.
No tur situashon di emergensia por wòrdu prevení. Semper lo tin malesanan repentino i aksidentenan. Pero algun situashon serio sí por wòrdu prevení òf tratá promé ku nan bira un emergensia. Esaki ta inkluí tene kondishonnan manera diabétis i preshon haltu bou di kontròl, tuma remedi manera dòkter a indiká, buska konseho médiko ora síntomanan kuminsá i tuma mas prekoushon den tráfiko.
Tras di kada sifra tin un pashènt. Ora hòspital ta kasi yen, esaki tin konsekuensia real pa hende: Ta e pashènt di emergensia ku ta warda pa un kama. Ta e pashènt ku di repente mester un operashon. Pero tambe ta e pashènt ku ta warda hopi tempu kaba pa su operashon, pero ku na último momentu ta haña un kanselashon pa un kaso di emergensia por haña prioridat. CMC ta komprondé kon difísil i desepshonante esaki por ta pa e pashèntnan i nan famianan. P’esei, CMC ta sigui enfoká riba loke e por mehorá: sigui redusí e lista di espera pa operashon, hasi uso mas efisiente di e salanan di operashon, mehorá e proseso pa pashèntnan por sali di hòspital, plania kapasidat mihó i hasi e mihó uso posibel di e kambernan i personal disponibel.
CMC ta hasi un yamada na tur partnernan den kuido di salú i na komunidat pa sigui traha huntu riba prevenshon, tratamentu na tempu, bon kontròl di malesanan króniko, seguridat den tráfiko i uso apropiá di e servisio di kuido.
Tene Kòrsou salú ta kuminsá promé ku un hende yega na Emergensia. Protehá e kapasidat di nos hòspital ta un responsabilidat di nos tur, pa asina ora un hende realmente mester kuido urgente òf spesialisá, e kuido ei por sigui ta disponibel.
