Willemstad, 31 di ougùstùs, 2023 – Curaçao Medical Center (CMC) ta afirmá su kompromiso den kuido pa pashènt pa medio di inisiativanan fuerte di entrenamentu i desaroyo. Ku un departamento dediká na entrenamentu i desaroyo, CMC a tuma pasonan signifikante pa sigurá edukashon kontinuo pa su empleadonan ku ta kondusí na mehorashon di kalidat di kuido.
Enfoke komprensivo di CMC ta inkluí no solamente entrenamentu general pa tur su personal, pero tambe sertifikashonnan spesialisá pa departamentonan di enfermeria, aliniá ku e standartenan estrikto di Joint Commission International (JCI) i regulashonnan di Inspekshon di Salú. Den e departamentonan manera Kuido Intensivo Neonatal, Diálisis, Unidat di Kuido Kritiko (CCU), Kuido Intensivo i Emergensia, mas o ménos 160 enfermero a realisá nan sertifikashon spesialisá.
For di inisio di proseso di sertifikashon na 2019, esfuersonan di CMC a enfrentá un pousa temporal durante pandemia di Covid-19. Sinembargo, e hòspital ta keda firme den su meta pa sertifiká tur enfermera den e departamentonan aki. Esaki ta un kompromiso ku ta suprayá CMC su dedikashon pa mantené su mes na e standartenan mas haltu di kuido pa pashènt. Aktualmente, kasi 100% di e enfermeranan aki a keda sertifiká, ku eksepshon di algun ku ainda mester kuminsá nan proseso.
Den kolaborashon ku institushonnan manera IFE i Universidatnan Médiko na Hulanda, esfuersonan di entrenamentu di CMC ta enfatisá kresementu kolektivo i atkisishon di abilidatnan avansá. E avanse den kualifikashonnan di enfermeronan ta atribuí na un gran parti di e esfuersonan inkansabel pa e departamento di Entrenamentu i Desaroyo di CMC i e dedikashon di su empleadonan.
“Dor di empoderá nos tim di enfermeronan pa medio di edukashon spesialisá, esaki ta reflehá nos dedikashon na bienestar di nos pashèntnan,” Alejandra Ferrari, Direktor di HR, ta bisa. “E logronan aki ta simbolisá un nivel mas haltu di kompetensia entre nos profeshonalnan di enfermeria, ku ta tradusí direkto na un kalidat di kuido mas elevá.”
CMC su kompromiso kontinuo na edukashon i entrenamentu ta simbolisá e hòspital su vishon pa por destaká den kuido i e promesa pa brinda kalidat di kuido kontinuo na su pashèntnan.
