Diálisis peritoneal (spula barika)

Kon e tratamentu ta?

Akinan bo ta haña tur informashon importante di bo tratamentu.

Preparashon

Kon bo ta prepará?
Bo ta haña informashon i un demonstrashon serka e enfermero di PD. E ta bin serka bo na kas pa evaluá si ta posibel pa hasi e diálisis di PD na kas.

Treinen CAPD

Si bo ta bai hasi diálisis periteonal, bo mes lo ta aktivo den bo tratamentu. Pa e motibu ei nos ta duna bo un treinen. Esaki ta tuma lugá na Curaçao Medical Center, huntu ku un miembro di famia. Pa e treinen bo mester bin hòspital par di dia tras di otro. Einan bo ta haña treinen durante un par di ora i despues bo por bai kas bèk. Bo mester keda bin hòspital miéntras esaki ta nesesario. Tantu abo komo e enfermero ku ta guia bo mester tin tur konfiansa ku bo mes por hasi e diálisis na kas.

Enfermero di PD

Ora bo kuminsá ku e diálisis na kas despues di bo treinen, un enfermero ta kompañá bo huntu ku wijkzorg. E enfermero ta kontrolá si tin problema ku mester keda solushoná. Wijkzorg tambe ta yuda kaminda ta nesesario

E tratamentu

Kon e tratamentu ta?
Ku diálisis peritoneal (spula barika) ta saka materia residual, vògt i salu ku un tubu (kateter) for di bo barika. E kateter aki mester keda posishoná promé pa un siruhano.
Durante e diálisis bo peritoneo (flishi di barika) ta hasi uso komo filter. E líkido di spula ta keda den bo apdómen pa algun ratu i ta drenta den kontakto ku bo peritoneo. Asina ta surgi un interkambio entre e líkido di spula i bo sanger. Si e líkido di spula ta yen di materia residual, mester remplasá esaki ku líkido nobo.

Kua dunadó di kuido ta enbolbí den e diálisis peritoneal?

Un enfermero di diálisis, nefrólogo (dòkter); trahadó sosial (si esaki ta nesesario), dietista (si esaki ta nesesario).

Continue Ambulante Peritoneaal Dialyse (CAPD)

Ku CAPD e interkambio di materia ta tuma lugá 24 ora pa dia. Ora ta trata di e tipo di diálisis aki, bo no ta keda konektá na un mashin. Bo mes ta hasi e tratamentu di CAPD. Mayoria persona ta spula 4 bes pa dia. Tres bes esaki ta sosodé banda di e orario di kome i e último bes promé ku bo bai drumi. Un spulamentu ta dura mas o ménos 30 minüt. Ora bo ta kla tin líkido di diálisis den bo barika, esaki ta sòru pa e drenahe di materia residual i vògt for di bo kurpa. Despues di mas o ménos 4 ora e líkido ta saturá i bo ta bolbe saka e líkido i hinka líkido nobo. Mardugá e líkido ta keda den bo kurpa pa un periodo mas largu. Ku e tipo di diálisis aki pues semper tin líkido den bo barika.

Kas
Kiko ta e kosnan ku bo mester kòrda ora bo ta na kas?
E kos di mas importante ta ku bo mester por spula na un manera higiéniko.

Suministro di material
Fresenius ta sòru ku tur material ku ta nesesario pa bo spula bo barika yega serka bo na kas. Despues ta trese e material kada dos siman.

Ki rekompensashon bo ta risibí pa diálisis periteonal?

E kompania di seguro ta paga tur material ku bo tin mester.

Bo ta bai ku fakansi?

Ta posibel pa bai ku fakansi ku diálisis periteonal. Bo dòkter mester duna pèrmit pa esaki. E enfermero di PD lo duna un splikashon di e kosnan ku bo mester regla.