Willemstad, 24 di Ougùstùs 2023 – Curaçao Medical Center (CMC) ta anunsiá e lansamentu ofisial di su enkuesta outomatisá di satisfakshon di pashènt. E inisiativa aki ta planiá pa kuminsá ofisialmente Djabièrnè, 25 di Ougùstùs. Pashèntnan ku a bishitá hòspital pa tratamentu òf sita pa konsulta for di yüli lo risibí un link di e enkuesta via WhatsApp, pa nan por kompartí nan pensamentu i opinion relashoná ku nan proseso di kuido.
E enkuesta tin komo meta pa simplifiká e proseso di reakshonnan, i duna pashèntnan e opshon pa duna nan eksperensia riba e servisionan ku nan a risibí di CMC na un manera fásil i lihé. E enkuesta lo midi 8 area di servisio na pashènt:
- Konfiansa den konseho di kuido risibí
- Tratamentu efektivo
- Kontinuidat di kuido
- Envolvimentu i sosten pa famia i ser kerí
- Informashon komprendibel, komunikashon i sosten durante di kuido
- Partisipashon den desishon i rèspèt pa preferensianan di pashènt
- Sosten emoshonal, empatia i rèspèt
- Atenshon pa aspektonan físiko i ambiențal
E reakshonnan riba e puntonan aki lo duna CMC e oportunidat pa por sigui mehorá su servisionan, i sòru pa e nesesidatnan i preferensianan di pashèntnan keda un prioridat na momentu ku nan risibí kuido.
Entrante di e fecha di lansamentu, tur pashènt lo risibí e link di e enkuesta den un siman despues di nan bishita, enfatisando mas ainda e dedikashon di CMC pa ta aktivamente envolví ku pashèntnan i atendé nan preokupashonnan.
cmc.cw
