Willemstad, 2 di Aprel, 2025 – Durante e último aña, vários spesialista na Curaçao Medical Center (CMC) a entregá nan retiro, indikando “LNT” komo parti di e desishon. E siman aki tres spesialista mas a retirá. Inspektor di Salú ta na altura di e situashon aktual.
Miéntras CMC ta rekonosé e desishon di e spesialistanan, e hòspital ke sigurá na su pashèntnan i komunidat ku tur medidanan nesesario a wòrdu tumá pa garantisá kontinuidat di kuido i mantené e standart mas haltu posibel di servisio médiko. E prioridat prinsipal di CMC ta pa sigui brinda kuido médiko seif, konfiabel i profeshonal.
Gerensia di CMC ta ekspresá su gratitut sinsero na e spesialistanan ku ta bai, pa nan dedikashon i kontribushon durante nan tempu di servisio. “Nos ta apresiá nan kompromiso ku nos pashèntnan i komunidat, i nos ta deseá nan tur éksito den nan karera den futuro.”
Apesar di e kambio aki, CMC ta keda firme den su mishon pa sigui duna kuido médiko ekselente na pueblo di Kòrsou.
