WILLEMSTAD, 5 di yüli 2024 – Riba 24-25 di yüni, instruktornan di kuido di Karibe Hulandes a reuní pa selebrá nan kolaborashon eksitoso ku Amstel Academy, Dutch Caribbean Hospital Alliance (DCHA) i e Ministerio hulandes di Salubridat, Bienestar i Deporte (VWS). Huntu nan a logra fasilitá varios treinen i kurso pa mas ku 600 profeshonal di kuido i a desaroyá plannan sostenibel pa sigui ku e kolaborashon. Amstel Academy a reflehá riba e progreso kolektivo i a ekspresá optimismo pa futuro.
Na desèmber 2022, instruktornan di Aruba, Boneiru, Kòrsou, Sint Eustatius, Sint Maarten i Saba, den kuadro di DCHA, a kolaborá ku Amstel Academy pa sigurá un supsidio di €1.8 mion for di VWS. E fondonan aki a wòrdu designá pa edukashon di kuido di salú agudo relashoná ku COVID-19, fortalesé e resiliensia di e islanan atraves di planifikashon i preparashon stratégiko. Investigashonnan i reunionnan ekstenso a kondusí na e aprobashon di un aplikashon di supsidio amplio, ku a resultá na edukashon di mas ku 683 profeshonal di kuido di salú den vários spesialismo, inkluyendo enfermeria di Emergensia, Kuido Intensivo, Kuido Agudo di Kurason, Diabétis i Anestesia. Curaçao Medical Center (CMC) so a entrená mas ku 400 dunadó di kuido, ku programanan kontinuo di 2025 te ku 2027.
Rekonosiendo nan logronan, instruktornan di hòspital di CAS-BES a reuní personal pa evaluá progreso, selebrá logronan i deliberá riba strategia pa futuro. Fundashon Mariadal tabata e anfitrion di e evento, organisá pa Horacio Oduber Hospital (HOH). Varios instruktornan,inkluyendo Lisette Riley (A.M. Edwards Medical Center), Antonio Pantophlet (Sint Maarten Medical Center), Macha le Poole (Hospital San Francisco, Fundashon Mariadal), Roxana Maduro i Milbania Werleman (IMSAN), i Chanine Cruden (Curaçao Medical Center) a partisipá.
Durante dos dia intensivo, e grupo a partisipá den seshonnan di evaluashon dirigí pa Amstel Academy i un workshop di strategia pa HOH. Nan a revisá nesesidatnan di edukashon den futuro ku un enfoke riba desaroyá programanan pa mehorá konektividat i redusí gastunan di tur e islanan. Alabes, tur instruktor a kompartí avansenan di nan isla korespondiente riba tereno di edukashon kual a inspirá inovashon.
CMC a presentá un modèl di inovashon edukativo pa DCHA pa e programa general di enfermeria, diseñá pa mehorá eksperensia práktiko i fortalesé kompetensianan profeshonal.
E evento a finalisá ku diskursonan di Profesor Lenie Denteneer (HOH), Dr. Giovanni Frans (DCHA), i un mensahe di video di VWS.
