Willemstad, 9 di òktober 2025 – Ayera, Curaçao Medical Center (CMC) a realisá ku éksito un simulashon kompletu di un kaso di kandela pa tèst e tempu di reakshon, kordinashon i proseduranan di seguridat na momentu di un emergensia.
E simulashon akí a wòrdu hasí den estrecho kolaborashon ku CMC Vastgoed, e team di seguridat interno i Brantwer Kòrsou. E ehersisio a simulá un situashon real pa evaluá kon prepará e timnan ta i pa sigurá ku tur hende por reakshoná lihé i efektivo bou di preshon.
E resultado a mustra ku e proseduranan di emergensia di CMC ta funshoná bon i ku tin un kooperashon fuerte entre tur esnan envolví. E puntonan ku mester mehorá tabata mínimo i lo tuma e medidanan nesesario.
E simulashon akí ta afirmá e kompromiso kontinuo di CMC pa mantené un ambiente seif i sigur pa su pashèntnan, bishitantenan i empleadonan.
