Introdukshon
General
Bo mester mèldu uso di tur remedi adelantá. Un siman promé ku tratamentu i den konsulta ku bo dòkter bo mester stòp di tuma aspirina òf otro remedi kontra doló ku ta kontené e ásido acetylsalicylic. Den konsulta ku bo dòkter òf e servisio di trombosis tambe bo mester para uso di remedi ku ta hasi sanger delegá, manera por ehèmpel Marcoumar, Sintromitis òf Clopidogrel. E dia despues di e prosedura bo por kontinuá uso di e remedinan aki. Si bo ta bou di tratamentu na otro kaminda òf bo ta alérgiko pa sierto supstansia òf remedi, bo mester mèldu esaki tambe.
E dia di e prosedura
Riba e dia di e prosedura bo por kome i posiblemente tuma bo remedi. Riba e dia ei bo no por apliká makiahe na bo wowonan òf apliká krema pa kara.
E prosedura
Promé ku e tratamentu un enfermero ta limpia e kueru rondó di e wowonan i ta pinta kaminda mester operá. Ku anestesia lokal pa medio di algun inyekshon, e klèp di wowo parti ariba i abou lo haña anestesia. E tratamentu ta dura mas o ménos 30 minut pa e klèp di wowo parti ariba i mas o ménos un ora pa esnan parti abou. Ta kima e adernan sera durante e prosedura pa asina prevení sangramentu. Ta sera e heridanan ku un kosé ku ta kita atrobe despues di mas o ménos un siman. Ta tapa e puntanan di e kosé ku pleister chikitu. E pleisternan mester keda na lugá pa un siman. No kita nan òf trata di kita òf kòrta e puntanan bo mes!
Konseho despues di un korekshon di klèp di wowo
- Si tin un poko pèrdida di sanger, drumi plat i primi e herida pa 10 minüt ku un gas òf pida paña. Despues di 10 minüt e sangramentu mester a para.
- Ora e anestesia kita, e areanan tratá por sinti doloroso. Ta konsehabel pa tuma un òf dos paracetamol na tempu (por ehèmpel promé ku bo bai drumi). No tuma aspirina. Esaki por hasi sanger delegá.
- Ora ta trata un korekshon di e klèp di wowo parti abou, por ta asina ku e dòkter ta duna bo un resèpt pa un remedi ku ta prevení infekshon, ku ta promové sanashon di herida i tin un efekto trankilisante. Apliká e krema aki poko poko na rant di e klèp di wowo pa e krema meskla bon ku e líkido di wowo. Ripití esaki dos bia pa dia.
- Usa un kòmprès friu òf un saku di bonchi di fris durante e promé 3 dianan kada ora pa mas o ménos 10 minüt pa fria i asina prevení hinchamentu i ku rondó di e wowo ta bira blou. No buta e kòmprès friu òf saku di bonchi di fris direktamente riba e kueru i e herida, pero protehá esaki dor di buta un pida gas òf paña bou di e kòmprès friu.
- Ta konsehabel pa no bebe alkohòl pa 24 ora despues di e tratamentu. Alkohòl por hasi sanger delegá.
- Si bo kabei di wowo (wemper) ta pegá na otro, bo por limpia nan poko poko ku awa i un pida katuna òf posiblemente ku vaselin.
- Laga e pleisternan na lugá te ora bo bai poli pa kòntròl i pa kita e puntanan. Bo ta haña un sita pa esaki.
- Riba e dia di bo prosedura mes bo por baña. Purba tene e klèpnan di wowo seku mas tantu ku ta posibel. Si e klèp di wowo muha, seka nan poko poko ku un sèrbètè.
- Evitá trabou ku ta eksigí hopi esfuerso, pero tambe di bùk i hisa durante e promé siman. Despues di 7 dia bo por hasi trabou di kas leve i trabou atministrativo. No ta rekomendabel pa hasi trabou duru, landa, bai sauna i deporte intensivo pa e promé dos simannan.
- Bo por sufri di lus fèl, prinsipalmente lus di solo, den e promé simannan despues di e prosedura. Hasi uso mas tantu posibel di un brel di solo. Tambe bo por eksperensiá un sentimentu lam na e klèp di wowo òf wemper. Tambe por ta asina ku e klèp di wowo ta sinti stèif, prinsipalmente ora bo ta hasi bo wènkbrou. E sensashonnan aki lo disparsé durante e proseso di sanashon di mas o ménos 4 pa 6 luna.
- Bo tin dos momentu di kòntròl; despues di un siman pa kita e puntanan i pa kontrolá e sikatris. E di dos kòntròl ta despues di 6 pa 8 siman pa wak kon e rekuperashon ta bai.
- Ta importante ku ta yega na e resultado final despues di 6 luna.
Teksto di hustifikashon
E teksto aki ta destiná pa komplementá e kombersashon ku bo dòkter. E informashon general aki no por hustifiká kada situashon individual tur bia. Si bo tin kualke pregunta despues di lesa e informashon aki, e siruhano plástiko lo ta kontentu di papia ku bo durante ora di konsulta. Por ta útil pa skibi bo preguntanan adelantá.
