Introdukshon
Sa sosodé hopi ku e kueru rondó di e klèp di wowo ta rèk asina tantu ku e ta bai kologá riba e wowo (blefarochalasis). Esaki por okashoná problema ku bista. Un keho komun di pashèntnan ta ku esaki ta buta ku nan ta mustra bieu i kansá òf ku nan ta haña doló di kabes. Blefarochalasis di e klèp di wowo ariba ta un konsekuensia di e kueru riba e wowo ku ta rèk. Tin bia esaki ta bai kompañá ku hinchamentu di e tehido den e wowo, i asina e kueru ta bai dilanti i okashoná un bulto riba e wowo. Ora e kueru di e klèp di wowo bira slap, por koregí esaki ku sirugia plástiko. Esaki tambe yama blefaroplastia.
Preparashon
Si bo ta tuma remedi pa hasi sanger delegá (manera por ehèmpel marcoumar, aspirin, sintrom(itis), ascal, clopidogrel) bo mester indiká esaki durante e kombersashon ku bo ta hiba ku e médiko. Bo mester para uso di e remedinan aki 1 siman promé ku e operashon. Si bo ta bou di tratamentu òf ta alérgiko pa un sierto supstansia òf remedi, tambe bo mester indiká esaki na bo médiko.
No apliká krema na e klèpnan di wowo i kara riba e dia di bo operashon.
E prosedura
Korekshon di e klèpnan di wowo ariba ta tuma lugá a base di un operashon poliklíniko i bou di anestesia lokal, ku algun eksepshon bou di anestesia general. Durante e operashon e siruhano plástiko promé ta indiká kua parti di e kueru mester kita. Despues di esaki, despues di anestesia, ta hasi un insiso den e kueru di e klèp di wowo ariba. Awor por kita e kueru eksesivo. Gran parti di e sikatris ta keda den e vòu natural di e klèp di wowo. E sikatris kasi no ta visibel.
Despues di e operashon
Despues di un korekshon, e klèpnan di wowo por ta hinchá i blou. Sinembargo, kasi nunka esaki ta asina grave ku bo no por mira. Tambe ta posibel ku bo no por habri òf sera bo wowonan kompleto pa e promé tempu despues di e operashon. No ta apliká pleister na bo wowo, pues laba i baña ta keda posibel. Na e puntanan di e kosé si bo ta haña pleister chikitu. Bo mester laga esaki keda pa 1 siman. Ta konsehabel pa evitá hisa, bùk òf preshoná durante e promé dianan.
Por ta asina ku bo dòkter ta konsehá bo pa fria e klèp di wowo na kas, spesialmente durante e promé tres dianan ku un kòmprès friu ku bo por kumpra adelantá. En bes di e kòmprès bo por hasi uso di un saku di bonchi di fris tambe (kòrda buta un pida gas òf paña entre bo kueru/e herida i e kòmprès). Tambe ta bon pa bo deskansá bon e dianan aki. E doló i hinchamentu asina ta haña chèns di baha. Un remedi pa kombatí doló usualmente no ta nesesario.
Despues di un siman ta kita e puntanan na poli. Bo ta haña un sita pa esaki. Despues di esaki posiblemente bo por hunta e sikatris poko poko ku un krema. Pa motibu di reakshon di e sikatris, por ta asina ku bo klèp di wowo ta bira steif. Miéntras e sikatris ta kòrá, ta konsehabel pa protehá nan ku brel di solo òf sunblock. Tambe bo por eksperensiá un sentimentu lam di e klèpnan di wowo (wemper) òf akumulashon di líkido rondó di e wowonan. Despues di tempu e kehonan aki ta disparsé. Bo klèpnan di wowo ariba ta sana kompletamente despues di mas o ménos 6 luna.
Riesgo i komplikashonnan
Tin bia despues di un korekshon di e klèpnan di wowo, por surgi un lèk di sanger. Mayoria bia esaki no ta grave, pero ta tuma mas tempu pa e klèpnan di wowo mustra normal atrobe. Tambe por surgi deskolorisashon.
Un komplikashon ku ta surgi masha poko ta e pashènt ta bira siegu. E komplikashon aki ta surgi masha poko. Si bo nota ku bo bista ta bai atras despues di e operashon, bo mester tuma kontakto ku hòspital mesora pa solushoná esaki manera mester ta sin ku bo ta sufri daño permanente.
Kompensashon
E gastunan di un korekshon di e klèpnan di wowo ariba, usualmente ta keda kompensá den e seguro básiko, basta tin un indikashon médiko pa esaki. Den un kaso asina e kueru ekseso di e klèp di wowo por lo ménos mester kai riba e wemper òf okashoná un limitashon di bista.
Teksto di hustifikashon
E teksto aki ta destiná pa komplementá e kombersashon ku bo dòkter. E informashon general aki no por hustifiká kada situashon individual tur bia. Si bo tin kualke pregunta despues di lesa e informashon aki, e siruhano plástiko lo ta kontentu di papia ku bo durante ora di konsulta. Por ta útil pa skibi bo preguntanan adelantá.
