Introdukshon
Generalmente ta eliminá anomalia di kueru manera por ehèmpel tumor di kueru, frèt i hinchá bou di kueru na poliklínika bou di anestesia lokal. Esaki semper ta laga un sikatris atras. E manera ku e tratamentu ta tuma lugá i e manera ku bo kurpa ta kura, ta determiná e resultado final di e sikatris. Sierto parti di kurpa manera e skouder, lomba i tabla di pechu ta oumentá e riesgo di sikatris, kompará ku otro partinan di e kurpa. Esaki ta okashoná pa e echo ku na e partinan di kurpa aki tin mas tenshon riba e herida durante e proseso di sanashon. Mas aleu lo ta kla ku un herida okashoná pa un kuchú skèrpi ta laga un sikatris mas bunita atras, kompará ku por ehèmpel un herida di sker. Disturbio den e proseso di sanashon di un herida, manera por ehèmpel pa motibu di un infekshon, por okashoná un sikatris grave.
Anomalia di kueru por ta benigno (por ehèmpel un fibroma, un tumor di vèt tambe yamá lipoma, òf glándula di talg ferstòp (atheroom) òf maligno (inkluso basal cell carcinoma or basalioma, melanoma). Usualmente ta manda e anomalia ku ta kita for di e kueru pa un eksaminashon PA (Pathological Anatomical) pa haña sa kiko e anomalia ta i si a kita esaki por kompleto.
Eksaminashon
E siruhano plástiko ta eksaminá i palabrá ku bo kiko e anomalia ta. E ta splika kua téknika kirúrgiko ta mihó adekuá pa bo i tambe ta splika e bentaha i desbentahanan di esaki.
Preparashon
Si bo ta tuma remedi pa hasi sanger delegá (por ehèmpel marcoumar, aspirin, sintrom(itis), ascal, clopidogel) bo mester mèldu esaki durante e kombersashon. Bo mester para uso di e remedinan aki un siman promé ku e operashon. Si bo ta bou di tratamentu otro kaminda òf si bo ta alérgiko pa sierto supstansia òf remedi, tambe bo mester mèldu esaki.
E tratamentu
Bo ta haña un sita pa e prosedura na poliklínika.
Bo mester mèldu na e bali di e kamber di espera na poli algun minüt promé ku e tempu.
Ora di kita un anomalia di kueru, e siruhano plástiko mester tene konsiderashon ku e gravedat di e anomalia i e sitio. Semper nos lo trata na hasi e prosedura di tal forma ku tin ménos sikatris.
Despues di e tratamentu
Reglanan nobo di bida i konseho pa kuido ta dependé di e tratamentu. Bo siruhano plástiko lo informá bo tokante esaki. En general bo lo no eksperensiá muchu doló despues di e operashon. Tin sierto pashènt ta eksperensiá hinchamentu leve di e sikatris òf e área aki por bira steif pa poko tempu despues di e operashon.
En general ta buta pleister chikitu riba e puntanan di e herida i tambe un pleister mas grandi òf ferbant. Bo mes por kita esaki un dia despues di e tratamentu. Bo ta laga e pleister chikitu te ora bo bolbe bishitá poli pa kòntròl. Despues di 1 òf 2 siman ta kita e puntanan na poli. Bo por baña i e pleister i herida por muha.
Mas rùst bo duna bo herida, mas mihó e ta kura. Pa e motibu ei ta konsehabel pa no hasi ehersisio, no landa, baña muchu largu òf hisa kos pisa pa 2 te 6 siman despues di e operashon. Bo dòkter lo palabrá esaki ku bo. Duna masashi ku krema por hasi e sikatris mas flèksibel mas lihé, pero bo mester hasi esaki solamente despues ku bo a laga kita e puntanan i ora e herida a kura kompletamente. Miéntras ku e herida ta kòrá ta konsehabel pa protehá esaki ku sunblock. Tene konsiderashon ku e echo ku ta tuma por lo ménos 6 (kara) pa 12 (sobrá di kurpa) luna pa sikatris kura kompletamente.
Bo lo haña un yamada e siguiente dia pa un sita pa kontrolá na poli.
Posibel komplikashon i riesgo
Sierto sikatris eventualmente ta bira mas hanchu ku a antisipá. E siruhano plástiko semper lo trata di hasi e sikatris mas chikitu posibel, pero e sikatris nunka lo disparsé kompletamente. Pa e motibu ei, ta bon na altura di loke bo por ferwagt di e sikatris.
Teksto di hustifikashon
E teksto aki ta destiná pa komplementá e kombersashon ku bo dòkter. E informashon general aki no por hustifiká kada situashon individual tur bia. Si bo tin kualke pregunta despues di lesa e informashon aki, e siruhano plástiko lo ta kontentu di papia ku bo durante ora di konsulta. Por ta útil pa skibi bo preguntanan adelantá.
