Willemstad, 5 di mart 2026 – E promé kurso mMOET (Managing Medical & Obstetric Emergencies and Trauma) organisá na Kòrsou den Curaçao Medical Center (CMC) ta marka un paso importante den kuido materno. Ginekólogo Dr. Nurah Hammoud a koordiná e kurso. Su liderazgo a hunga un ròl klave den trese e programa di training aki ku ta internashonalmente rekonosé na Kòrsou.
Organisando e kurso aki na CMC ta fortalesé e kapasidat di e hòspital pa manehá komplikashonnan ku ta forma menasa pa bida durante embaraso i parto. Spesialistanan den kuido tabatin e oportunidat di kompletá e kurso intensivo di emergensia di opstetria lokal i na e propio hòspital kaminda e emergensianan aki ta presentá diariamente.
Emergensianan manera hemoragia severo, eklampsia, sèpsis i ataka di kurason materno por eskalá den un par minüt. E programa di mMOET ta diseñá spesifikamente pa train dòkternan i timnan di kuido agudo pa rekonosé señalnan krítiko di atvertensia, tuma desishon lihé i aktua efektivamente bou di preshon ora tantu bida di e mama i e beibi ta na peliger.
E kurso a wòrdu fasilitá den kolaborashon ku ekspertonan di Hulanda i spesialistanan lokal, den kuadro edukashonal di Advanced Life Support Group (ALSG). Pa medio di simulashonnan realístiko basá riba senario kondusí na CMC, partisipantenan a praktiká manehá emergensianan opstétriko kompleho den un ambiente klíniko kontrolá pero sumamente eksigente.
Partisipantenan na e kurso a inkluí ginekologo, anestesiologo, intensivista i dòkternan di kuido agudo di Kòrsou i Aruba, huntu ku tres enfermera lokal di opstetria i genekologia. Nan partisipashon ta reflehá un kompromiso kompartí pa fortalesé seguridat materno den henter e region.
E promé edishon eksitoso akí ta marka un invershon proaktivo den parto mas sigur i resultadonan materno mehorá pa Kòrsou, reforsando e kompromiso di CMC pa duna e nivel di mas haltu di kuido opstétriko di emergensia ora kada minüt ta konta.
