Introdukshon
E anomalia ta den e sistema di kondusí stimulashon. E sistema aki ta garantisá ku e múskulo di e kurason ta sera i relahá. Komo konsekuensia di esaki bo kurason por bati muchu lihé, muchu poko poko òf iregular. Tin aritmia di kurason ku no ta dañino, pero tambe tin ku ta grave.
Mas informashon? Bishitá hartstichting.nl
Eksaminashon
Pa eksaminá e ritmo di bo kurason i konstatá un anomalia, e kardiólogo por hasi un variashon na tèst, manera por ehèmpel un eksaminashon elektrofisiológiko. Banda di esei otro tèst tambe ta posibel.
Video di kurason (elektrokardiograma, E.C.G.)
Ku un E.C.G. nos ta midi e aktividat eléktriko di e múskulo di bo kurason.
E aparato di E.C.G. ta hasi esaki visibel den un gráfiko riba un pantaya òf riba papel. Ta un eksaminashon lihé i seif ku no ta hasi doló.
Eksaminashon di baiskel (ergometria)
Durante un eksaminashon di baiskel, un tékniko ta traha un E.C.G. miéntras abo ta kore baiskel.
Durante ehersisio e kurason mester traha mas duru i mester di mas energia i oksígeno. Komo resultado di esaki, un eventual anomalia di kurason ta bira mas visibel ku un E.C.G. durante un eksaminashon di baiskel. Ku e eksaminashon aki, e kardiólogo por evaluá kon e fluho di sanger pa e múskulo di bo kurason ta durante ehersisio.
Holter (registrashon di ritmo di kurason)
Ku un holter, tambe yamá ECG dinámiko, un aparato ta graba e ritmo di bo kurason pa por lo ménos 24 ora. E aparato ta mas o ménos e grandura di un telefòn selular (grandi). E ta den un saku ku bo por karga rònt di bo garganta. Durante e eksaminashon bo mester mantené un dagbuk.
E eksaminashon aki por dura 24 ora òf mas.
Tratamentu
Bo kardiólogo por trata aritmia di kurason ku, por ehèmpel, remedi. Banda di esei tambe tin vários otro opshon pa tratamentu, manera ablashon i e posishonamentu di un desfibriladó interno (ICD).
Elektrokardioversion
Un elektrokardioversion ta un tratamentu pa restourá e ritmo iregular di kurason pa un ritmo di kurason regular. Esaki por enbolbí fibrilashon di e kurason. Ku un elektrokardioversion bo ta haña un shòk eléktriko. Esaki ta pasa ora bo ta bou di anestesia general.
Posishonamentu di un pacemaker
E kardiólogo por posishoná un pacemaker si bo tin un ritmo di kurason muchu poko poko i/òf si bo kurason no ta bati bon mas.
Un pacemaker ta yuda bo kurason funshoná mas mihó posibel dor di regularmente dun’é koriente eléktriko. Bo no ta sinti esaki. Un pacemaker por tin 1, 2 òf tres kabel/elektrode. Esaki ta dependé di e rason pa kua bo ta haña un pacemaker. Bo kardiólogo lo palabrá esaki ku bo adelantá.
Un pacemaker ta un aparato elektróniko chikitu. E pacemaker ta konsistí di un bateria i elektrónika ku ta den un kashi di titanio. E kurpa ta tolerá e metal aki bon. E kabelnan ta garantisá ku e koriente ta yega na e kurason. Via e final di e kabel e pacemaker ta duna un impulso di koriente na e kurason. E elektrónika di e pacemaker por keda kompará ku un kòmpiuter hopi chikitu. E bateria ta sòru ku e pacemaker por hasi su trabou pa vários aña.
Klínika i departamento pa pashèntnan ambulatorio
Kardiologia
Un kardiólogo ta spesialisá den rekonosé i trata kondishonnan di e kurason i adernan grandi.
