Fayo di kurason

Eksaminashon

Tèst di sanger

Ku tèst di sanger nos ta tuma sanger ku un angua hòl pa yena un òf mas tubu di sanger. Un analista ta analisá e sanger aki den e laboratorio. Tèst di sanger, tèst di urina i tèst di shushi ta nesesario si e médiko general òf spesialista ke sa mas di bo salú. E dòkter tambe ta hasi investigashon pa determiná e kurso di e malesa i e efekto di e tratamentu.

Video di kurason (elektrokardiograma, E.C.G.)

Ku un E.C.G. nos ta midi e aktividat eléktriko di e múskulo di bo kurason.
E aparato di E.C.G. ta hasi esaki visibel den un gráfiko riba un pantaya òf riba papel. Ta un eksaminashon lihé i seif ku no ta hasi doló.

Ekografia di kurason (ekokardiografia)

Ku un ekografia e tékniko ta eksaminá bo kurason hasiendo uso di olanan di ultrazonidu.
Esaki ta olanan di zonidu na un frekuensia haltu ku bo no por tende òf sinti. Nan no ta dañino pa bo kurpa tampoko. E olanan di zonidu ta keda reflehá bèk via e kurason (eko). Komo un resultado por mira bo kurason riba un pantaya durante e eksaminashon.
E tékniko regularmente ta traha grabashon di bo kurason. Esaki ta duna bo kardiólogo informashon tokante e movishon i funshonamentu di e múskulo i adernan di bo kurason. Esaki ta permití e kardiólogo pa evaluá e funshon di pòmp di bo kurason i pa determiná si tin anomalia den e adernan di kurason.

Kateterisashon di kurason

Durante un kateterisashon di kurason, e kardiólogo ta eksaminá e adernan koronario di e kurason. Pa medio di un tubu den e ardu, e kardiólogo ta hinka un kateter. Via e kateter spesial aki, e dòkter ta inyektá kantidatnan chikitu di líkido di kontraste den e adernan koronario. Riba e pantaya di rayo X, e kardiólogo por mira kon e adernan koronario ta kana, na unda nan ta será i kon severo esaki ta. E kardiólogo por usa un kateterisashon di kurason komo un eksaminashon pero tambe komo tratamentu, manera por ehèmpel e tratamentu di dotter. Durante kateterisashon di kurason ta tuma lugá vários eksaminashon, manera por ehèmpel un eksaminashon di e adernan koronario pa medio di olanan di zonidu (IVUS) òf midi e preshon (di sanger) den e adernan koronario (Fractional Flow Reserve, FFR).

Por tin vários motibu pa kua bo ta haña un kateterisashon di kurason, manera por ehèmpel:

• Bo tin doló den bo pechu (angina pectoris);
• Tin problema ku e valf di bo kurason;
• Bo a haña un atake di kurason;
• Bo ta sufri di aritimia di kurason.

E kardiólogo lo ke sa eksaktamente den ki estado bo adernan koronario òf bo adernan grandi ta. Akinan bo por lesa mas di e eksaminashon aki.

Tratamentu

Den kaso di un fayo di e kurason, bo ta haña remedi ku ta redusí e síntomanan i ta prevení e fayo di bira pió. Mas aleu un manera di biba salú ta importante.

Posishonamentu di un pacemaker

E kardiólogo por posishoná un pacemaker si bo tin un ritmo di kurason muchu poko poko i/òf si bo kurason no ta bati bon mas.
Un pacemaker ta yuda bo kurason funshoná mas mihó posibel dor di regularmente dun’é koriente eléktriko. Bo no ta sinti esaki. Un pacemaker por tin 1, 2 òf tres kabel/elektrode. Esaki ta dependé di e rason pa kua bo ta haña un pacemaker. Bo kardiólogo lo palabrá esaki ku bo adelantá.

Un pacemaker ta un aparato elektróniko chikitu. E pacemaker ta konsistí di un bateria i elektrónika ku ta den un kashi di titanio. E kurpa ta tolerá e metal aki bon. E kabelnan ta garantisá ku e koriente ta yega na e kurason. Via e final di e kabel e pacemaker ta duna un impulso di koriente na e kurason. E elektrónika di e pacemaker por keda kompará ku un kòmpiuter hopi chikitu. E bateria ta sòru ku e pacemaker por hasi su trabou pa vários aña.