Guia
Den e promé siman bo por ta kansá i eksperensiá falta di rosea. Esaki ta normal despues ku bo a haña un operashon pa remplasá e klèp di bo kurason. Bo lo tin un sita pa kontrolá pa 4 pa 6 siman ku bo kardiólogo. Hopi bia nos ta saka un potrèt di bo kurason, pa asina nos por tin un mihó bista di e funshonamentu di e klèp di bo kurason.
Por ta asina ku nos ta registrá bo pa rehabilitashon di kurason. Si esaki ta e kaso bo lo haña mas informashon di esaki.
Ta importante pa bo tene bo mes na vários regla den e tempu benidero. Esaki ta nifiká ku bo mester presta atenshon na e siguiente puntonan:
- Tuma bo remedinan manera indiká pa e dòkter.
- Den e promé 4 simannan bo no por kore outo òf baiskel. Durante bo promé bishita di kòntròl na poli, bo kardiólogo lo evaluá si bo por partisipá den tráfiko atrobe.
- Den e promé siman bo no mester hasi niun ehersisio físiko pisá. No hisa kos pisá den e promé siman aki (no mas ku 5 kg)
- Mas o ménos 1 siman despues di bo estadia na hòspital, bo por sigui ku bo aktividatnan diario.
- Aktividat seksual no mester ta un problema despues di e operashon.
- No baña òf landa den e promé siman. Dor di esaki bo herida por bira moli i esaki ta oumentá e riesgo pa sangramentu. Bo por baña pa un tempu kòrtiku (máksimo 5 minüt).
- Si tin líkido ta sali for di bo heridanan di las, bo mester tapa esaki di nobo. Ta importante pa bo keda remplasá un ferbant ku a muha, pa asina redusí e riesgo pa un infekshon.
- No hunta krema òf puiru riba e heridanan si bo dòkter no a preskribí esaki. Tambe ta mihó pa no drumi den solo pa muchu largu pa un aña despues di bo operashon. Esaki no ta bon pa e proseso di sanamentu di bo herida.
- Kualkier blousá por move. E koló ta bira ménos i lo disparsé despues di mas o ménos 6 siman. Den sierto kaso bo por tin kosé den e las òf bou di bo pechu. E dòkter por kita esaki 10 dia despues di e operashon.
- Bo por drumi riba bo zei òf barika.
- Kòntròl na aeropuerto i den tienda no ta un problema. Bo por biaha solamente despues di konsultá bo kardiólogo durante e promé kòntròl.
Prosedura di djente òf médiko
- Semper indiká na bo dentista òf médiko ku bo a haña un implantashon di klèp aortika.
- Si bo ta haña un prosedura di djente òf médiko den futuro, ta importante pa bo haña antibiótika pa un tempu kòrtiku promé ku e prosedura aki.
- Un bon higiena oral i kòntròl na dentista tambe ta sumamente importante. Esaki ta pa prevení ku bakteria ta okashoná un infekshon den e klèp di kurason.
- Pa sierto prosedura, bo mester stòp temporalmente ku remedi pa hasi sanger delegá. Semper bo mester palabrá esaki ku bo kardiólogo.
Pas di identifikashon pa e prótesis di klèp di kurason
Algun tempu despues di e operashon bo ta risibí un asina yamá identifikashon pa e prótesis di klèp di kurason na kas. E pas aki ta indiká bo nòmber, fecha di nasementu, tipo di klèp di kurason, na unda a implantá e klèp di kurason i e fecha di e operashon. Semper tene e pas aki huntu ku bo. Den kaso di un emergensia, e pas aki ta importante pa trahadónan di emergensia.
Ki ora bo mester tuma kontakto ku nos?
- Por fabor tuma kontakto ku nos si bo ta eksperensiá keho manera:
* keintura riba 38.5 grado; - si e herida na bo las ta kòrá, kayente, ta hasi doló, ta saka pus òf ta hinchá;
- si bo las kuminsá hasi doló òf si tin sangramentu;
- batimentu di kurason pa un periodo mas largu;
- faltamentu di rosea na momentu ku bo ta deskansá;
- mas líkido den pia; saka sleim hel/bèrdè ora bo tosa.
Durante e promé 10 dianan despues di hòspital bo por yama e klínika di kardiologia na poli durante oranan di ofisina na number di telefòn 745-0023 i despues di ora di ofisina por yama e unidat di kuido koronario na number di telefòn 745-0000 i puntra nan pa konektá bo.
Bo tin pregunta?
Si bo tin kualke pregunta òf problema despues di 10 dia, yama bo dòkter.
Den kasonan di emergensia, yama 912!