Introdukshon
E remedi korekto pa un rekuperashon pronto.
Na sala di emergensia bo a haña konseho tokante alivio di doló pa bo yu. Akinan bo ta haña informashon adishonal ku por yuda ku alivio di doló serka bo yu. E teps i informashon mas importante bo ta haña den e video. Si despues di esei bo ke mas informashon, bo por lesa e teksto akibou.
Kiko ta doló?
Doló ta duna un sentido fèrfelu i no dushi. Tòg doló por ta hopi útil, paso e ta duna un atvertensia. Doló por tin vários kousa, manera por ehèmpel herida i kiebro di wesu, pero tambe un infekshon. E sentido di doló por varia di yu pa yu i di e gravedat. Tin bia tin un kousa kla pa e doló. Pa motibu di strès i tenshon por surgi doló di barika. E ora ei no tin daño na e kurpa pa motibu di un infekshon òf leshon, pero e doló aki ta mesun grave i tambe mester keda tratá.
“Un sifra robes no ta eksistí! Ta trata di doló ku bo yu ta eksperensiá na e momentu ei.”
Kon mi por sa ku mi yu tin doló?
Doló por tin un efekto grandi riba bo yu. Dor di doló bo yu por drumi malu, por tin ménos apetit òf no tin gana di hunga. Tambe muchanan por ta iritá, tristu òf mas ketu.
Muchanan mas yòn ku 4 aña no por difísil por indiká nan mes si nan tin doló i kon grave e doló ta. Pues ta importante pa presta atenshon na e komportashon di e mucha. Si e mucha keña òf bira mas ketu, por ta un indikashon ku e tin doló.
Si e mucha tin entre 4 i 8 aña, bo por puntr’é si e tin doló. Na sala di emergensia nos ta hasi uso di e eskala di kara kaminda e mucha mes ta indiká kon e ta sinti.
Muchanan di 8 aña i mas grandi generalmente mes por indiká kuantu doló nan tin pa medio di un sifra entre 0 i 10, kaminda 10 ta mas tantu i 0 ta indiká ku e yu no tin doló. Por ta asina ku bo yu tin doló solamente na sierto momentu, por ehèmpel ora e tosa òf move.
Dikon remedi pa aliviá doló ta importante?
Remedi pa aliviá doló ta forma parti di e tratamentu di bo yu. E dòkter ta traha un estimashon si bo yu por tin doló despues di tratamentu na sala di emergensia. Si ta asina, e dòkter lo konsehá pa hasi uso di remedi pa aliviá doló. Un kiebro di wesu por ehèmpel por duna hopi doló apesar ku e yu tin geps.
Tin vários remedi pa doló manera paracetamol i diclofenac. Pa kada remedi ta konta un kantidat máksimo ku bo yu por haña. Den promé instante bo yu ta haña paracetamol. Banda di e paracetamol e dòkter por konsehá otro remedi. E remedinan pa aliviá doló aki tin un otro efekto ku paracetamol. Dor di usa nan huntu, nan por fortifiká e efekto.
Kon mester atministrá e remedi pa aliviá doló?
Tin vários tipo di remedi pa aliviá doló.
- un tablèt; por tuma esaki ku awa, vla òf yoghurt.
- sierto remedi pa aliviá doló tambe ta disponibel komo bebida òf tablèt di smèlt.
- un zètpil; esaki ta un píldora largu blanku ku ta smèlt despues di atministrá esaki via e anus.
Ora bo yu ta grandi sufisiente, ta preferibel pa dun’e e remedi pa medio di un tablèt òf bebida. Esaki tin mihó efekto. Por hasi esaki kada 6 òf 8 ora. Eventualmente por buta un alarma pa kòrda bo. No warda te ora bo yu indiká ku e tin doló, bo mester aktua promé ku e doló.
E remedinan ta seif?
Si hasi uso di e remedinan segun e dosis ku dòkter a preskribí, e remedinan ta seif pa mucha. Nunka duna otro remedi òf remedi adishonal.
Mas informashon?
Semper bo por hasi bo dòkter di kas òf e dòkter ku a tratá bo na poli pregunta tokante remedi pa aliviá doló.
