Introdukshon
Bo a haña un konmoshon selebral, por ehèmpel durante un aksidente, kaida òf un klap na bo kabes. Dòkter ta bisa bo ku bo por bai kas. Den e video bo ta haña e informashon i tep mas importante.
Riba e página aki bo ta lesa:
- kiko un konmoshon selebral ta
- kiko e kehonan por ta
- teps pa kas
- kon bo por oumentá bo aktividatnan
- ku kua keho bo mester tuma kontakto ku bo dòkter (di kas)
Kiko ta un konmoshon selebral?
E terminologia médiko pa konmoshon selebral ta trouma leve di kabes i selebre. Ku un konmoshon selebral bo selebre ta keda sakudí pa un tempu kòrtiku. Bo por pèrdè konosementu pa un ratu i kisas bo no ta kòrda tur kos. Mayoria bia e rekuerdonan te djis promé ku e aksidente ta bin bèk. Pero por ta asina ku bo no ta kòrda nada di e periodo despues di e aksidente. Esaki nos ta yama posttraumatische amnesie (PTA). Pasombra e selebre no ta warda informashon durante e periodo aki, e memoria aki mayoria bia no ta regresá. E ora ei tampoko tin sentido di keda buska e memoria aki.
Kehonan
Kehonan komo konsekuensia di trouma na selebre por dura algun siman te luna. Den mayoria kaso e trouma ta pasa. Despues di mei aña mayoria hende ku un konmoshon selebral no tin keho mas.
Maske ku un konmoshon selebral ta algu relativamente inosente, por sosodé ku durante e promé 24 ora ta surgi komplikashonnan peligroso. Si bo dòkter ta manda bo kas, bo por asumí ku e riesgo riba un komplikashon asina, virtualmente ta ekskluí.
Den e promé dia- òf simannan hopi hende ta eksperensiá keho. Esaki ta normal i den mayoria kaso nada pa preokupá kuné. Kehonan komun ta:
- doló di kabes
- mariá
- un bista vago
- problema di konsentrashon
- prosesamentu di informashon mas poko poko
- kansansio
- iritá mas lihé
- zonidu den orea
- hiper sensibilidat pa lus i zonidu
Atenshon!
Tuma kontakto mesora ku bo dòkter den e promé dia- òf simannan despues di un konmoshon selebral si bo situashon ta empeorá lihé. Presta atenshon riba kehonan manera por ehèmpel:
- un oumento drástiko di doló di kabes
- sakamentu kontinuo
- konfushon
- sentimentu sùf (lanta for di soño difisil)
Teps pa kas
Pa evitá ku e kehonan ta empeorá e promé tempu, nos ta duna algun tep general pa e promé dianan:
- bai poko poko. No ta bon pa keda den kama hinter dia, pero bo mester tuma rùst regularmente si.
- de-eskalá e momentonan di rùst, pa despues di algun dia bo por ta riba pia kompletamente i por sigui ku algun tarea.
- wak televishon, kòmpiuter i hunga wega no ta un problema, pero no hasi dimas.
- no bebe alkohòl. Esaki ta empeorá e kehonan i ta redusí e rekuperashon.
- no bebe aspirin.
- bo por tuma paracetamol kontra doló, te un máksimo di kuater bia pa dia 1000 miligram, basta bo dòkter di kas no a konsehá otro.
Atenshon!
Esaki ta teps general. Bo dòkter por a duna bo konseho personal tambe. Ta importante pa bo sigui e konseho personal aki, paso tur pashènt ta otro.
Konstruí poko poko
Asta si bo tin algun keho ainda, no ta un problema pa bo kuminsá traha atrobe. Traha un plan ku bo dunadó di trabou i bo dòkter di trabou pa tiki tiki bo yega na bo oranan i tareanan atrobe.
Por sosodé ku bo ta haña un kaida si bo ta kuminsá traha mas ora òf hasi tareanan mas pisá. No keda deskurashá. Mayoria bia despues di un kaida ta bai mas mihó.
Legalmente no ta prohibí pa partisipá den tráfiko ku un konmoshon selebral. E responsabilidat ta keda serka bo mes. Hasi deporte ta posibel si bo ta kapas di hasi esaki. Djis no ehersé deporte ku ta kontené e riesgo ku bo ta haña un klap na bo kabes, manera por ehèmpel futbòl, hòki òf bòkseo.
Despues di 6 luna
Despues di 6 luna kasi tur pashènt ku un konmoshon selebral a rekuperá kompleto. Un grupito por eksperensiá kehonan pa un periodo mas largu. Por ehèmpel:
Kehonan físiko
- doló di kabes
- hiper sensibilidat pa lus i zonidu
- mariá, problema di ekilibrio
- kansansio
- problema pa drumi
- ménos sentido di holó òf sabor
Problema ku komportashon i emoshon
- iritá
- impulsivo
- instabil i kambio di beis
- falta di inisiativa
Problema ku pensa
- problema ku presta atenshon, konsentrashon
- problema ku memoria
- problema ku plania i ehekutá aktividat
Atenshon!
Si despues di 6 luna ainda bo tin keho, ta importante pa atrobe bo tuma kontakto ku bo dòkter di kas. Huntu boso por mapa e kehonan i palabrá posibel tratamentu, por ehèmpel pa siña atendé mas mihó ku bo kehonan. Bo dòkter di kas eventualmente por mandá bo pa un neurólogo. Tin bia despues di algun aña ta surgi sierto keho ku tin di aber ku trouma selebral ku a tuma lugá anteriormente. Pa e motibu ei semper ta importante pa mèldu bo dòkter si bo a yega di haña un konmoshon selebral.
Mas informashon?
Semper bo por hasi pregunta tokante remedi pa doló na bo dòkter di kas òf e médiko ku ta atendé bo na poli.
