Ki tipo di kemadura tin?
Tin vários tipo di kemadura. E distinshon aki ta importante paso e tratamentu ta varia pa tipo di kemadura:
Kemadura di promé grado:
Ku un kemadura di promé grado e kueru no a sufri daño. E kueru ta kòrá, seku, doloroso i tin bia un tiki hinchá. Pensa por ehèmpel na un kueru ku a kima den solo.
Kemadura superfisial di segundo grado:
Ku un kemadura superfisial di segundo grado e kueru a sufri daño. E kueru ta kòrá, muhá i doloroso. Tambe e pashènt ta haña blar.
Kemadura profundo di segundo grado:
Ku un kemadura profundo di segundo grado e kueru klaramente a sufri daño. E kayente a haña chèns pa un tempu mas largu pa penetrá e kueru i klaramente tin un herida. E kerida ta kòrá/blanku, muhá i hopi doloroso. Akinan tambe e pashènt por haña blar.
Kemadura di terser grado:
Ku un kemadura di terser grado e herida ta blanku òf pretu, seku i e kueru ta manera kurtí. Ku un kemadura di terser grado kasi bo no ta sinti doló paso e nèrvionan den e kueru a keda afektá. Kemadura di terser grado mayoria bia ta surgi den kombinashon ku kemadura di promé i segundo grado.
Kiko e tratamentu pa kemadura ta enserá?
- ku tur kemadura bo por tuma remedi pa aliviá doló (paracetamol).
- ku kemadura di promé grado i ku kemadura superfisial di segundo grado e tratamentu ta konsistí di aplikashon di krema manera ‘after sun’ òf bodylotion.
- kemadura profundo di segundo grado òf di terser grado ta keda tratá pa e dòkter òf enfermero ku krema zilversulfadiazine òf gas vèt.
- blar grandi òf kibrá ta wòrdu kitá.
- un bakuna kontra tetanus. Esaki ta nesesario si bo a haña e bakuna aki mas di 10 aña pasá.
Kiko bo mes por hasi?
Hopi bia despues di 1 pa 2 dia bo mester bai hòspital òf serka bo propio dòkter di kas pa un kòntròl. E ora ei bo ta haña informashon i splikashon adishonal di kon bo mester atendé ku e herida.
En general ta konta lo siguiente:
- ku kemadura profundo di segundo i terser grado ta nesesario pa bo kambia e ferbant tur dia. Bo ta spula kita e zalfi ku awa. Despues bo ta buta krema nobo riba e herida.
- despues ku e herida a kura ta importante pa bo mantené e sikatris vèt ku krema.
- si e kemadura ta riba òf serka di un skarnir, bo mester move e skarnir aki djis despues di e kemadura. Moveshon ta prevení ku e skarnir ta bira steif.
- den e promé aña bo mester evitá solo riba e sikatris òf hunta e lugá di e sikatris bon ku krema di zonnebrand di faktor 20 òf mas haltu.
- ora e kemadura kura, e kueru por kishikí, trata di no grawatá.
Kua komplikashon por tuma lugá?
Un kemadura por haña un infekshon.
Riba término largu e siguiente komplikashonnan por tuma lugá:
- formamentu di sikatris;
- kontrakshon; dor di un kontrakshon kontinuo di tehido por pasa ku un òf mas skarnir ta krese kròm;
- limitashon den moveshon;
- pèrdida di sensibilidat; e kemadura a afektá e nèrvionan di sensibilidat chikitu. Dor di esaki e sentimentu na e kueru ta bira ménos òf kita kompleto.
Ki ora bo mester tuma kontakto ku un dòkter?
Keintura òf un herida kayente i kòrá ta e promé indikashonnan di un infekshon. Ta importante pa e ora ei bo tuma kontakto ku e dòkter na warda.
Mas informashon?
Pa mas informashon nos ta dirigí bo pa sala di emergensia kaminda bo a haña tratamentu òf pa bo dòkter di kas.
