Kiko ta un inflamashon di blas?
Un inflamashon di blas ta un inflamashon di e slèimflis di e blas. Mayoria bia un inflamashon di blas ta keda okashoná pa bakteria di e tripa diki. Mayoria bia ta trata di e bakteria ‘Escherichia coli’, mihó konosí komo E. Coli. Fúngus tambe por okashoná inflamashon na blas. Dor ku hende muhé tin un bùis di urina mas kòrtiku, un inflamashon di blas ta mas komun serka hende muhé.
Tambe tin un riesgo mas haltu riba inflamashon di blas durante embaraso, diabétis, konstipashon, piedra na nir òf edat mas avansá.
Ora a konstatá inflamashon di blas serka bo, mayoria bia e tratamentu ta konsistí di antibiótika. E ora ei ta importante pa bo kaba e kür.
Kiko e kehonan ta?
Un inflamashon di blas ta duna keho manera uriná mas frekuente, urina mas tiki, doló ora di uriná i tin bia sanger huntu ku e urina. Hopi bia e urina tin un holó stinki i tambe bo por sufrí di doló di barika i mariá. Si bo ta sufri di doló na lomba tambe, e inflamashon por ta mas haltu den e trakto urinario, i por ta asina ku bo tin un inflamashon di trèktu di nir.
Kiko bo mes por hasi?
- bebe sufisiente
- bo por tuma paracetamol (4 bia 1000 mg pa dia)
- no posponé pa bai tualèt i purba saka tur urina
- despues di kontakto seksual hende muhé mester uriná bon pa asina mitigá e riesgo riba un inflamashon di blas
- higiena di tualèt ta importante pa hende muhé; ora limpia e labio di vulva ku papel di wc, hasi esaki un bia di dilanti bai patras.
Ki ora bo mester tuma kontakto ku un dòkter?
- ora bo tin keintura
- si despues di e kür di antibiótika ainda bo tin keho
- si bo haña doló den bo lomba. Esaki por indiká un inflamashon di trèktu di nir.
- si bo uriná ku kuahadura i bo no por uriná mas.
Pa mas informashon nos ta dirigí bo pa sala di emergensia kaminda bo a haña tratamentu òf pa bo dòkter di kas.