Kiko e tratamentu di repchi kibrá òf kontushoná ta enserá?
No ta posibel pa trata esaki ku geps. E tratamentu ta konsistí solamente di remedi pa aliviá doló, ku ta sumamente importante. Pa esaki semper sigui e konseho di bo dòkter. Mas informashon tokante uso korekto di remedi pa aliviá doló, bo por lesa den e foyeto di ‘Alivio di doló pa adulto’.
Kiko bo mes por hasi?
Pa aselerá e proseso di rekuperashon nos ta duna bo algun konseho:
- pa evitá komplikashon ta importante pa bo hala rosea profundo regularmente. Bo por hasi esaki dor di hala rosea profundo algun bia tras di otro un bes pa ora.
- trata di no oprimí tosa. Hala rosea profundo i tosa por ta doloroso, pero si ta importante. Tosa bon por prevení un eventual infekshon di pulmon.
- dor di tene bo mes na e konseho di remedi pa aliviá doló, lo ta mas fasil pa sigui hala rosea i tosa.
Kon bo rekuperashon ta sigui?
Repchi kibrá òf kontushoná por lo general ta kura di su mes. E rekuperashon di un kiebro por dura mas o ménos 6 siman, pero bo por keda eksperensiá doló pa un periodo mas largu.
Ki ora bo mester tuma kontakto ku bo dòkter?
Posibel komplikashon di un kontushon òf kiebro di un òf mas repchi ta inkluí infekshon di pulmon òf un pulmon ku a kolèps. Si bo eksperensiá keho manera benout, keintura òf tosa ku sleim, nos ta konsehá bo pa tuma kontakto ku bo dòkter (di kas).
Mas informashon?
Pa mas informashon nos ta dirigí bo pa e sala di emergensia kaminda bo a haña tratamentu òf pa bo dòkter di kas.
