Willemstad, 27 di febrüari 2025 –– Curaçao Medical Center (CMC) ta sigui mira un oumento den pashènt ku influenza. Aktuálmente tin 16 persona interná. E komplikashon mas komun ta problemanan respiratorio. Miéntras ku influenza ta sigui presente den komunidat, CMC ta rekordá públiko pa tuma medidanan di prevenshon pa evitá propagashon di e vírùs.
Pa manehá e kasonan na un manera mas efektivo, CMC a implementá medidanan pa e pashèntnan interná. Esaki ta nifiká ku pashèntnan ku Influenza lo wòrdu separá for di demas pashèntnan den hospital. Tin dos tipo di Influenza, kual ta A i B. Influenza A ta agrupá huntu den áreanan asigná, separá for di esnan ku Influenza B. Na e momentunan aki, mayoria kaso ta di Influenza A. Separando e pashèntnan aki ta yuda prevení transmishon di infekshon i ta garantisá ku nan ta risibí e tratamentu apropiá.
Ku e festividatnan di Karnaval aserkando, i e aglomerashonnan di hende ku esaki ta trese, por tin un oumento den kasonan di influenza den e siman despues di e selebrashonnan. Pa minimisá riesgo, CMC ta konsehá públiko pa:
- Praktiká bon higiene – Laba man frekuente ku awa i habon.
- Tapa tosá i nister – Usa un papel pa prevení propagashon di mikrobio.
- Keda kas si bo no ta sinti bon – Evitá kontakto ku otro hende pa prevení transmishon di influenza.
CMC ta sigui monitòr e situashon di serka. Nos ta pidi públiko pa keda informá i tuma e medidanan nesesario pa protehá nan mes i otro.
